O‘zbekiston va Qozog‘iston bosh vazirlari 611,3 million dollarlik 54 ta shartnoma imzoladi

O‘zbekiston va Qozog‘iston bosh vazirlari Abdulla Aripov va Asqar Mamin 26-noyabr kuni Turkistonda bo‘lib o‘tgan ikki mamlakat o‘rtasidagi uchinchi mintaqalararo hamkorlik forumi doirasida muzokaralar o‘tkazdi, deb xabar qildi Qozog‘iston bosh vaziri matbuot xizmati.

Markaziy Osiyodagi mintaqaviy savdoning qariyb 70 foizi Qozog‘iston va O‘zbekiston hissasiga to‘g‘ri keladi. 2021-yilning 9 oyida o‘zaro tovar ayirboshlash hajmi 2,9 milliard dollardan oshdi, bu 2020-yilning shu davriga nisbatan 28,5 foizga ko‘pdir.

“Mashinasozlik, qurilish industriyasi va farmatsevtika sanoati sohasida yangi qo‘shma loyihalar uchun boshqa salohiyatli o‘sish nuqtalari ham mavjud”, — dedi Asqar Mamin.

Hukumat rahbarlari o‘zaro tovar ayirboshlash hajmini 2022-yilda 5 milliard dollarga, 5 yil ichida esa 10 milliard dollarga yetkazishga kelishib oldi.

Forum doirasida mashinasozlik, agrosanoat kompleksi, qurilish materiallari, elektrotexnika mahsulotlari, tibbiyot buyumlari ishlab chiqarish, infratuzilmani rivojlantirish va sanoatning boshqa sohalarida umumiy qiymati 611,3 million dollarlik 54 ta investitsiya va tijorat shartnomalari imzolandi.

Qozog‘iston bosh vaziri ikki davlat o‘rtasida atrof muhitni muhofaza qilish, suv va o‘rmon xo‘jaligi sohasidagi hamkorlik muhimligini ta‘kidladi. Birgalikda sa’y-harakatlar natijasida vegetatsiya davrida To‘qto‘g‘ul va Qayroqqum suv omborlaridan qo‘shimcha suv oqizilishi ta’minlandi, bu esa ikki davlat qishloq xo‘jaligi mahsulotlari yetishtiruvchilarining ehtiyojini ta’minladi.

Asqar Mamin, shuningdek, Orol dengizining qurigan tubida saksovul plantatsiyalarini ekish bo‘yicha sa’y-harakatlarni muvofiqlashtirish taklifini bildirdi.