Bosh prokuraturada tashkil etilgan Gender tengligi bo‘yicha komissiyaga tizimda ishlovchi xotin-qizlardan shu vaqtgacha zo‘ravonlik, tazyiq va bosim holatlari haqida birorta ma’lumot kelib tushmagan. Bu haqda komissiya rahbari, bosh prokuror o‘rinbosari Svetlana Ortiqova 26-noyabr kuni “Yangi O‘zbekistonda oilaviy zo‘ravonlikni oldini olish va oilaviy zo‘ravonlikdan jabr ko‘rganlarga amaliy ko‘mak berish: muammo va yechimlar” mavzusida o‘tkazilgan xalqaro konferensiyadan so‘ng tashkil etilgan matbuot anjumanida ma’lum qildi.
“Prokuratura organlarida, masalan, 350 nafar ayol ishlasa, ular bilan har kuni bo‘lmasa ham, kunda-kunora gaplashaman. Men juda kuchli psixologman, ko‘ziga qarayman, ovozidan bilaman — meni aldamaydi. Bosh prokuraturadagi Gender tengligi bo‘yicha komissiya rahbari sifatida aytamanki, shu vaqtgacha menga unaqa xabarlar kelmadi. Qani, prokuror ayolga tazyiq qiladigan erkakni bir ko‘ray-chi!”, — dedi Svetlana Ortiqova, jurnalistlarning huquq-tartibot idoralarida ishlovchi xotin-qizlarga ham zo‘ravonlik va tazyiq holatlari bo‘ladimi, mazmunida berilgan savoliga javob berarkan.
“Men hayotim davomida unday erkaklarni ko‘rganim yo‘q, bo‘lmasa bosh prokuror o‘rinbosari bo‘lib o‘tirmasdim”, — dedi Ortiqova. O‘z navbatida, u xarassment (shilqimlik, tegajoqlik) masalasida alohida fikr bildirdi. “Har kim birovning xatti-harakatini [har xil] tushunadi. Hozir, masalan, metroda yosh bolani ko‘rsam, o‘g‘lim yo nevaramga o‘xshaysan deb boshini silasam, siz shuni xarassment deb tushunasizmi? Yoki bir erkak kelib, uni farzandiga, nevarasiga o‘xshatsa, shirin gapirsa, yordam bersa-chi?.. Masala ko‘p, birgalikda muhokama qilishimiz kerak”, — dedi prokuror xonim.
“Hali juda ko‘p ishlar qilishimiz kerak va o‘zimizdan boshlashimiz kerak. Shunga munosabatimizni o‘zgartirishimiz kerak. Dunyoqarashimizga yot g‘oyalarga men qarshiman. Chunki u davlat va jamiyatni barbod qilish holatigacha olib kelishi hech gap emas. O‘zimizni, milliy o‘zligimizni anglaylik-da, shunga qarab qadam bosaylik”, — deya qo‘shimcha qildi bosh prokuror o‘rinbosari Svetlana Ortiqova.
Xarassment nima o‘zi? Boshliqning tegajoqlik qilishimi? (Meduza’dan ko‘chirma)
“Nafaqat boshliqning tegajoqligi. Sodda qilib aytganda, xarassment — insonni kamsitadigan yo tahqirlaydigan, uning uchun noqulay vaziyatni yuzaga keltiradigan, unda uyat yoki qo‘rquv hissini uyg‘otadigan butun boshli nojo‘ya xatti-harakatlar ro‘yxati o‘rniga qo‘llaniladigan umumiy bir atama. Bu ko‘chada qizlarning ortidan hushtak chalishdan tortib jinsiy aloqaga majburlashgacha bo‘lgan ma’lum bir gaplar, imo-ishoralar, harakatlar bo‘lishi mumkin. Ha, ro‘yxat juda katta: haqoratlar, hazillar, tegajoqliklar, ta’qib, uyatsiz shamalar va tahdidlar — bularning bari xarassmentning turli ko‘rinishlaridir. Boz ustiga, xarassment faqat jinsiy aloqa mazmunida bo‘lmaydi: bir kishi boshqa odamni yoshi, millati yoki terisining rangi, e’tiqodi, jismoniy va aqliy o‘ziga xosliklaridan kelib chiqib ham kamsitishi mumkin. Masalan, hamkasblaringizdan biri sizning diniy e’tiqodingiz haqida muntazam kamsitish tarzida fikr bildiraversa, bu ham xarassment. Yoki aksincha — agar ishda sizdan professional faoliyatingiz bilan bog‘liq bo‘lmagan diniy tadbirlarda ishtirok etishni talab qilishsa, bu ham xarassment”.
Izoh (0)