Farg‘onada qo‘shnisining homilador kelinini pichoqlab o‘ldirgan erkak 20 yilga qamaldi
Farg‘onada qo‘shnisining homilador kelinini pichoqlab o‘ldirgan 29 yoshli fuqaroga sud hukmi bilan 20 yil qamoq jazosi tayinlandi, deya xabar berdi “Daryo” muxbiri.
Jinoyat ishlari bo‘yicha Yozyovon sudi raisi Rahmatjon Arapovning ma’lum qilinishicha, Yozyovon tumani “Qorasoqol” mahalla fuqarolar yig‘inida yashovchi 1992-yilda tug‘ilgan U.N. internet orqali muntazam qimor va tavakkalchilikka asoslangan o‘yinlar o‘ynashi natijasida 100 million so‘mdan ortiq pul yutqazib, ko‘p miqdorda qarzdor bo‘lib qolgan.
2021-yilning 22-iyun kuni U.N. qarzlaridan qutulish maqsadida qo‘shnisi O.Q.dan 2 ming dollar pul olgan. Shundan so‘ng U.N. qo‘shnisining uyida ko‘p miqdorda pul bo‘lishi mumkinligini taxmin qilgan. U 23-iyun kuni soat 10:00 larda qo‘shnisinikida hech kim yo‘qligidan foydalanib, uning xonadoniga g‘ayriqonuniy tarzda kirgan. Xonadondagi mol-mulklarni yashirincha qo‘lga kiritmoqchi bo‘lgan vaqtida qo‘shnisining homilador kelini M.Q. kelib qolgan.
U.N. qilmishi oshkor bo‘lishidan qo‘rqib, qo‘shni kelinga pichoq bilan hujum qilgan, tanasining turli sohalariga tan jarohatlari yetkazgan. M.Q. faol qarshilik ko‘rsatib, qo‘shnilarni yordamga chaqirgani uchun U.N. hodisa joyidan yashiringan.
Fuqaro M.Q. ko‘rsatilgan tibbiy yordamga qaramasdan, olgan tan jarohatlari natijasida shifoxonaning jonlantirish bo‘limida vafot etgan.
2021-yil 23-iyun kuni mazkur holat yuzasidan Yozyovon tuman prokuraturasi tomonidan U.N.ga nisbatan Jinoyat kodeksining 97-moddasi 2-qismi “b”, “i” bandlari (homiladorligi aybdorga ayon bo‘lgan ayolni tamagirlik niyatida qasddan odam o‘ldirish), 164-moddasi 3-qismi “v”, “g” bandlari (uy-joyga, omborxona yoki boshqa binolarga g‘ayriqonuniy ravishda kirgan holda badanga og‘ir shikast yetkazib, bosqinchilik qilish) bilan jinoyat ishi qo‘zg‘atilgan.
2021-yil 5-oktabr kuni Jinoyat ishlari bo‘yicha Yozyovon tumani sudining hukmi bilan U.N. Jinoyat kodeksining 97-moddasi 2-qismi “b”, “i” bandlari, 164-moddasi 3-qismi “v”, “g” bandlari bilan aybli deb topilib, unga 20 yil ozodlikdan mahrum qilish jazosi tayinlangan.
Bundan avval Samarqandda qo‘shni ayolga 17 marta pichoq urgan erkakka hukm o‘qilgani, Andijonda 18 yoshli yigit kanalga oqizib yuborilgani aytilayotgan xabar yuzasidan jinoyat ishi qo‘zg‘atilgani hamda Qashqadaryoda o‘z ukasining oyoq-qo‘llarini sim bilan bog‘lab, tiriklayin yoqib yuborgan aka ushlangani haqida xabar berilgandi.
