O‘zbekiston Nogironlar jamiyati raisi, Karlar jamiyati raisi va Ko‘zi ojizlar jamiyati raisi senatorlar tomonidan “Ijtimoiy tadbirkorlik to‘g‘risida”gi qonunning qaytarilishi yuzasidan murojaat bilan chiqqani to‘g‘risida xabar berilgandi. Oliy Majlis Senatining ma’lum qilishicha, qonunni qo‘llab-quvvatlagan holda uni qabul qilishni so‘rab qilingan murojaatnoma yuzasidan senatorlar joyiga borib suhbat o‘tkazgan.

Foto: Oliy Majlis Senati matbuot xizmati

Senatning yigirmanchi yalpi majlisida senatorlar “Ijtimoiy tadbirkorlik to‘g‘risida”gi qonunning ba’zi normalarini qayta ko‘rib chiqish kerak deb hisoblab, uni qaytargan edi. Adliya vaziri Ruslanbek Davletov senatorlarning qonunni qabul qilishga qarshi bildirgan har bir argumentini rad etib, ayrim siyosatchilar “xalqdan kelib chiqayotgan yangi g‘oyalarni tushunmasligini” ta’kidlagandi. Oqibatda Senat raisi uzoq davom etgan debatga aralashishga va tomonlarni tinchlantirishga majbur bo‘lgandi.

Keyinroq O‘zbekiston Nogironlar jamiyati raisi, Karlar jamiyati raisi va Ko‘zi ojizlar jamiyati raisi senatorlar tomonidan mazkur qonunning qaytarilishi yuzasidan murojaat bilan chiqib, “erkin raqobatlasha olmaydigan imkoniyati tabiatan cheklangan shaxslar uchun juda kutilmagan holat bo‘lganini” bildirgandi.

Uchrashuvda Senat a’zolari Odil Iminov va Erkin Gadoyev tomonidan murojaatchilarga qonun nogiron, karlar va ko‘zi ojizlar jamiyatlarining murojaatnomasida keltirilgan masalalar, ya’ni imkoniyati cheklangan shaxslarga maydonda o‘zlarini ko‘rsatish, imkoniyatlarini to‘la namoyon etish, munosib ish haqi olish, ijtimoiy adolat nuqtayi nazaridan korxonalarning iqtisodiy ahvolini yanada yaxshilash, ishini faollashtirish, ishlab chiqarish hajmlari va ishchilar sonini oshirish, eng asosiysi imkoniyati cheklangan shaxslarga to‘g‘ridan to‘g‘ri imtiyoz va preferensiyalar berishni nazarda tutmasligi tushuntirilgan.

Shu bilan birga, Senat a’zolari tomonidan “Ijtimoiy tadbirkorlik to‘g‘risida”gi qonundagi normalar jamiyatlarning raislari so‘rayotgan maqsadlarga xizmat qilmasligi aytilgan. Ular imkoniyati cheklangan shaxslarga o‘z faoliyatlarini amalga oshirish uchun imtiyozlar hozir ham Soliq kodeksi, O‘zbekiston Prezidenti hamda Vazirlar Mahkamasining hujjatlarida o‘z aksini topgani, kelgusida tadbirkorlik sohasidagi munosabatlar hamda normativ-huquqiy hujjatlar yagona kodeksda nazarda tutilishini ta’kidlab o‘tgan.

Suhbat yakunida Senat a’zolari tomonidan mazkur qonunni qayta ishlash jarayonida ushbu jamiyatlar vakillari ham faol ishtirok etishi va muntazam ravishda doimiy hamkorlik qilinishi haqida kelishib olingan.

Eslatib o‘tamiz, Oliy Majlis Senati adliya vaziri bilan debatga sabab bo‘lgan qonunning rad etilishiga rasmiy munosabat bildirib, senatorlar muhokamaga qo‘yilgan barcha qonunlarni shunchaki ko‘r-ko‘rona ma’qullab yuboravermasligi, har bir hujjat yalpi majlisgacha juda ko‘p chig‘iriqlardan o‘tishini ma’lum qilgan.