Ўзбекистон Ногиронлар жамияти раиси, Карлар жамияти раиси ва Кўзи ожизлар жамияти раиси сенаторлар томонидан «Ижтимоий тадбиркорлик тўғрисида»ги қонуннинг қайтарилиши юзасидан мурожаат билан чиққани тўғрисида хабар берилганди. Олий Мажлис Сенатининг маълум қилишича, қонунни қўллаб-қувватлаган ҳолда уни қабул қилишни сўраб қилинган мурожаатнома юзасидан сенаторлар жойига бориб суҳбат ўтказган.
Сенатнинг йигирманчи ялпи мажлисида сенаторлар «Ижтимоий тадбиркорлик тўғрисида»ги қонуннинг баъзи нормаларини қайта кўриб чиқиш керак деб ҳисоблаб, уни қайтарган эди. Адлия вазири Русланбек Давлетов сенаторларнинг қонунни қабул қилишга қарши билдирган ҳар бир аргументини рад этиб, айрим сиёсатчилар «халқдан келиб чиқаётган янги ғояларни тушунмаслигини» таъкидлаганди. Оқибатда Сенат раиси узоқ давом этган дебатга аралашишга ва томонларни тинчлантиришга мажбур бўлганди.
Кейинроқ Ўзбекистон Ногиронлар жамияти раиси, Карлар жамияти раиси ва Кўзи ожизлар жамияти раиси сенаторлар томонидан мазкур қонуннинг қайтарилиши юзасидан мурожаат билан чиқиб, «эркин рақобатлаша олмайдиган имконияти табиатан чекланган шахслар учун жуда кутилмаган ҳолат бўлганини» билдирганди.
Учрашувда Сенат аъзолари Одил Иминов ва Эркин Гадоев томонидан мурожаатчиларга қонун ногирон, карлар ва кўзи ожизлар жамиятларининг мурожаатномасида келтирилган масалалар, яъни имконияти чекланган шахсларга майдонда ўзларини кўрсатиш, имкониятларини тўла намоён этиш, муносиб иш ҳақи олиш, ижтимоий адолат нуқтаи назаридан корхоналарнинг иқтисодий аҳволини янада яхшилаш, ишини фаоллаштириш, ишлаб чиқариш ҳажмлари ва ишчилар сонини ошириш, энг асосийси имконияти чекланган шахсларга тўғридан-тўғри имтиёз ва преференциялар беришни назарда тутмаслиги тушунтирилган.
Шу билан бирга, Сенат аъзолари томонидан «Ижтимоий тадбиркорлик тўғрисида»ги қонундаги нормалар жамиятларнинг раислари сўраётган мақсадларга хизмат қилмаслиги айтилган. Улар имконияти чекланган шахсларга ўз фаолиятларини амалга ошириш учун имтиёзлар ҳозир ҳам Солиқ кодекси, Ўзбекистон Президенти ҳамда Вазирлар Маҳкамасининг ҳужжатларида ўз аксини топгани, келгусида тадбиркорлик соҳасидаги муносабатлар ҳамда норматив-ҳуқуқий ҳужжатлар ягона кодексда назарда тутилишини таъкидлаб ўтган.
Суҳбат якунида Сенат аъзолари томонидан мазкур қонунни қайта ишлаш жараёнида ушбу жамиятлар вакиллари ҳам фаол иштирок этиши ва мунтазам равишда доимий ҳамкорлик қилиниши ҳақида келишиб олинган.
Эслатиб ўтамиз, Олий Мажлис Сенати адлия вазири билан дебатга сабаб бўлган қонуннинг рад этилишига расмий муносабат билдириб, сенаторлар муҳокамага қўйилган барча қонунларни шунчаки кўр-кўрона маъқуллаб юборавермаслиги, ҳар бир ҳужжат ялпи мажлисгача жуда кўп чиғириқлардан ўтишини маълум қилган.
Изоҳ (0)