Qashqadaryo viloyatida 2020—2021-yillarda korrupsiyaga yo‘l qo‘lgan 274 nafar mansabdor ma’muriy, 217 nafar mansabdor esa jinoiy javobgarlikka tortilgani ma’lum bo‘ldi. Bu haqda viloyat prokurori Erkaboy Tojiyev korrupsiyaga qarshi o‘tkazilgan majlisda aytib o‘tdi, deya xabar berdi “Daryo” muxbiri.

Qayd etilishicha, 26-oktabr kuni viloyat hokimligida hokim Zoir Mirzayev, Oliy Majlis Senatining sud-huquq masalalari qo‘mitasi raisi Narimon Umarov hamda ommaviy axborot vositalari ishtirokida yig‘ilish bo‘lib o‘tgan.

Yig‘ilishda so‘z olgan viloyat prokurori Erkaboy Tojiyev viloyatda 2020-yil va 2021-yilning o‘tgan davri mobaynida 273 nafar shaxs tomonidan 209 ta korrupsion holatga yo‘l qo‘yilganini ma’lum qilgan.

“O‘tgan ikki yilda 111 ta budjet tashkilotida 87 milliard so‘m budjet mablag‘lari talon-toroj qilingani aniqlandi. O‘rganish natijalariga ko‘ra, 274 nafar mansabdor ma’muriy, 217 nafar mansabdor esa jinoiy javobgarlikka tortildi”, — deydi Erkaboy Tojiyev.

Viloyat prokurorining ma’lumot berishicha, jinoyat sodir etgan mansabdorlarning 99 nafari xalq ta’limi tizimida faoliyat yuritgan bo‘lsa, 49 nafari tijorat banklarida, qolganlari esa maktabgacha ta’lim, sog‘liqni saqlash, mahalla va oilani qo‘llab-quvvatlash sohasida ish olib borgan mansabdorlar ekani ma’lum bo‘lgan.

“41 ta jinoyat ishi bo‘yicha 99 nafar xalq ta’limi tizimi mansabdori korrupsiyaga yo‘l qo‘ygani uchun jazolangan”, — deydi prokuror Erkaboy Tojiyev.

Erkaboy Tojiyevning qo‘shimcha qilishicha, viloyatda nafaqat xalq ta’limi tizimida, balki oliy ta’lim tizimi, xususan, Qarshi muhandislik iqtisodiyot institutida ish haqi va unga tenglashtirilgan budjet mablag‘larini talon-toroj qilish holati aniqlangan.

“Qarshi muhandislik iqtisodiyot instituti mas’ullari 2016—2020-yillarda 22 milliard so‘m mablag‘ni o‘zlashtirgan. Eng yomoni bu holat prokuratura xodimlari aralashmagunga qadar oshkor etilmagan. Vaholanki, 2016—2020-yillarda muassasada ichki audit nazorati ham bo‘lgan. Demak, bu ichki auditda tizimli ish yo‘q degan xulosaga kelinishiga sabab bo‘ladi”, — deydi viloyat prokurori.

Bundan avval O‘zbekistonda 190 ta normativ-huquqiy hujjat korrupsiyaga qarshi ekspertizadan o‘tkazilishi, oliy va o‘rta maxsus ta’limi tizimida 9 oyda qariyb 14 milliard so‘mlik moliyaviy kamchiliklarga yo‘l qo‘ygan 21 nafar xodim ishdan olingani hamda O‘zbekistondagi bog‘chalarda 9 oyda 6,6 milliard so‘mlik ish haqi va tovarlar o‘zlashtirib yuborilgani haqida xabar berilgandi.