“Tolibon” Putinning ularni terrorchi tashkilotlar ro‘yxatidan chiqarishi mumkinligi haqida aytgan gaplarini olqishladi

“Tolibon” harakati Rossiya prezidenti Vladimir Putinning harakat yetakchilarini terrorchilar safidan chiqarish ehtimoli haqidagi bayonotini olqishlaydi. Ular xalqaro hamjamiyat bilan “o‘zaro kelishuv tamoyili asosida” yaxshi munosabatlar qurish istagida ekanini da’vo qilmoqda, deb yozadi “Kommersant”.

“Afg‘oniston Islom Amirligi Tashqi ishlar vazirligi Rossiya prezidenti Vladimir Putinning amirlik rahbarlari nomlarining qora ro‘yxatdan chiqarilishi haqidagi bayonotlarini olqishlaydi”, — deb yozdi Afg‘oniston TIVning muvaqqat hukumatdagi vakili Abdul Qahor Balxiy Twitter’da.

Uning fikricha, dunyoning boshqa davlatlari “Afg‘onistonga bo‘lgan munosabatida ijobiy o‘zgarishlar yasashi” zarur, chunki bu mamlakatda urush tugagan.

“Valday” xalqaro klubi yig‘ilishida Putin “Tolibon”ni terrorchi deb tan olish qarori BMT darajasida qabul qilinganini aytdi. Uning so‘zlariga ko‘ra, Afg‘onistondagi vaziyatning rivojlanishiga qarab, birdamlikda ularni terrorchilar ro‘yxatidan chiqarish to‘g‘risida qaror qabul qilinadi. “Menimcha, biz bunga yaqinlashyapmiz. Rossiyaning pozitsiyasi shu yo‘nalishda harakat qilish bo‘ladi ”, — dedi Rossiya prezidenti. Uning ta’kidlashicha, qaror oldin, ya’ni harakatni terrorchilik tashkilotlari ro‘yxatiga kiritish paytda qanday tarzda qabul qilingan bo‘lsa, endi ham shunday tarzda qabul qilinishi kerak.

Avvalroq Putin “Tolibon” uchun narkobiznesdan tushadigan daromaddan voz kechish oson bo‘lmasligini aytgandi. “Afg‘oniston dunyodagi eng yirik afyun ta’minotchisi bo‘lib qolmoqda. Giyohvand moddalar yetishtirishga qarshi kurashishni va’da qilganiga qaramay, ‘Tolibon’ aslida buni uddalayaptimi, o‘zi bu bilan shug‘ullanyaptimi yoki shug‘ullanishni istamayaptimi, menga qorong‘i. Bugun, ayniqsa, iqtisodiyotdagi inqirozli vaziyatda bunday daromad manbaidan voz kechish oson bo‘lmaydi ”, — dedi Putin 15-oktabr kun bo‘lib o‘tgan Mustaqil Davlatlar Hamdo‘stligi sammitida.

Rossiya prezidenti, shuningdek, “Tolibon” bilan muloqot qilish zarurligini, lekin ularni tan olishga shoshilmaslik kerakligini bildirgan.