“Toshkent metropoliteni” DUK boshlig‘ining raqamlashtirish bo‘yicha o‘rinbosari lavozimiga chet ellik mutaxassis jalb qilinadi. Bu haqda Prezidentning metropoliten faoliyati samaradorligini oshirish to‘g‘risidagi 16-oktabrdagi qarorida belgilangan.

Foto: “Daryo” / Madina Nurman

Bundan tashqari, metropoliten faoliyatini rivojlantirish va samaradorligini oshirish strategiyasini ishlab chiqish uchun ilg‘or xorijiy tajribaga ega konsultantlarni jalb etish rejalashtirilgan.

Metropoliten faoliyati samaradorligini oshirishning asosiy yo‘nalishlari etib quyidagilar belgilangan:

  • xorijiy tajribaga asoslangan zamonaviy boshqaruv mexanizmlarini joriy etish;
  • infratuzilmani modernizatsiya qilish va harakatlanuvchi tarkibni bosqichma-bosqich yangilash;
  • xavfsizlik tizimini takomillashtirish orqali yo‘lovchilar va harakat xavfsizligi darajasini oshirish;
  • yerusti yo‘lovchilar tashish transporti yo‘nalishlari tarmog‘ini metropoliten tarmog‘i bilan birlashtirish;
  • sohani malakali kadrlar bilan ta’minlash.

Avvalroq ushbu qaror bilan “Toshkent metropoliteni” “O‘zbekiston temiryo‘llari” tarkibidan chiqarilib, Transport vazirligi tarkibiga o‘tkazilishi haqida xabar berilgan edi.

Hujjat bilan, shuningdek, 2022-yil 1-oktabrgacha 6 ta metro bekati atrofida avtoturargohlar tashkil etilishi belgilangan. 2022-yil 1-aprelgacha yerusti halqa metro bekati yo‘nalishida yo‘lovchilar uchun bepul Wi-Fi tizimini bog‘lash va yerosti metro bekatlarida mobil aloqa operatorlari xizmatlaridan foydalanish imkoniyatlari yaratiladi. Yerosti va yerusti metro bekatlarida savdo va xizmat ko‘rsatish maydonchalari tashkil etiladi.

2021-yil oxirigacha Toshkent metropoliteni uchun 5 ta, 2022-yilda 14 ta to‘rt vagonli metro poyezdi xarid qilinadi va poyezdlarning soni 80 taga yetkaziladi. Natijada metro poyezdlarining o‘rtacha yoshi 38 yoshdan 26 yoshga qisqaradi.