Samarqand viloyati Payariq tumanida mast holatda kasalxonada shifokor bilan tortishib, huquqbuzarlik qilgan shaxs haqida xabar berilgandi. Samarqand viloyat IIB axborot xizmatining “Daryo”ga ma’lum qilishicha, ushbu fuqaro 15 sutkaga qamalgan.
Foto: Samarqand viloyat IIB axborot xizmati
Ma’lum qilinishicha, 2021-yil 19-oktabr kuni Payariq tumani “Istiqlol” mahallasida yashovchi 1993-yilda tug‘ilgan D.E. tuman markaziy shifoxonasiga mast holatda kelib, shu yerda davolanayotgan bemorlar hamda xizmat vazifasini bajarayotgan shifokorlarning tinchligini buzib, shovqin ko‘targan.
Shifokor U.X. uni tinchlantirib tartibga chaqirganda, D.E. uning egnidagi kiyimidan tortib, jamiyatda o‘rnatilgan yurish-turish qoidasini qasddan mensimagan holda xatti-harakatlar sodir etgan.
Qayd etilishicha, holat yuzasidan tuman IIB tomonidan tergovga qadar tekshiruv olib borilib, to‘plangan hujjatlar Payariq tumani jinoyat ishlari bo‘yicha sudiga taqdim qilingan.
2021-yil 21-oktabr Payariq tumani jinoyat ishlari bo‘yicha sudi tomonidan fuqaro E.D. Ma’muriy javobgarlik to‘g‘risidagi kodeksning 183-moddasiga (mayda bezorilik) asosan aybli topilib, 15 sutka ma’muriy qamoq jazosi tayinlangan.
Mavzuga doir:
- Surxondaryoda qizini tekshirgan sud-ekspertiza xodimini haqoratlab, hokimiyat vakiliga qarshilik ko‘rsatgan shaxs 10 sutkaga qamaldi
- Samarqandda gaz yo‘qligi sabab norozilik bildirib, yo‘lni to‘sgan fuqarolarning ikki nafari 5 sutkaga qamaldi, 11 nafariga jarima tayinlandi
- Samarqandda mast holatda begona qizga shilqimlik qilgan erkak 15 sutkaga qamaldi
