“Tolibon” o‘z safini “yomon odamlar”dan tozalashni boshladi, AQShning Afg‘oniston bo‘yicha maxsus vakili iste’foga chiqdi. Afg‘oniston yangiliklari

Toliblar o‘z safini “yomon odamlar”dan tozalashni boshladi

Afg‘onistonda razvedka xizmatlari, Ichki ishlar vazirligi va Mudofaa vazirligining qo‘shma komissiyasi “Tolibon” safini korrupsionerlardan tozalashga kirishdi.

Ta’kidlanishicha, gap o‘z lavozimlarini qarindoshlari yordamida egallagan odamlar, jinoyatchilar, o‘tmishi shubhali bo‘lgan kishilar yoki mahalliy aholining nafratini qo‘zg‘atuvchi amaldorlar haqida borayotgan bo‘lishi mumkin.

“Razvedka bosh boshqarmasi, Mudofaa va Ichki ishlar vazirligi tomonidan ‘Tolibon’ safini va guruhlarini yomon va poraxo‘r odamlardan tozalash uchun tuzilgan qo‘shma komissiya Islom Amirligi (toliblar o‘z siyosiy tizimini shunday ataydi) vazirlari buyrug‘i bilan butun mamlakat bo‘ylab o‘z ishini boshladi”, — deb yozdi harakat vakili Zabihulla Mujohid Twitter’da.

AQShda Afg‘oniston bo‘yicha yangi maxsus vakilini tayinlandi

AQShning Afg‘oniston bo‘yicha maxsus vakili Zalmay Xalilzod iste’foga chiqqanidan keyin ushbu lavozimni uning sobiq o‘rinbosari Tomas Uest egallaydi.

“Avval maxsus vakil o‘rinbosari bo‘lgan Tomas Uest Afg‘oniston bo‘yicha keyingi maxsus vakilga aylanadi”, — deyiladi davlat kotibi Entoni Blinken bayonotida.

Blinken qayd etishicha, Uest Jo Bayden Barak Obama ma’muriyati davrida vitse-prezident lavozimini egallab turgan vaqtda u rahbarlik qilgan xavfsizlik guruhi tarkibida bo‘lgan.

Tomas Uest Jons Hopkins universitetini “xalqaro aloqalar” yo‘nalishi bo‘yicha bitirgan. Davlat departamenti va Oq uyda ishlab, Janubiy Osiyo va Yaqin Sharq muammolariga ixtisoslashgan.

2011—2012-yillarda Afg‘onistonning Kunar viloyatida qayta tiklash ishlari bilan shug‘ullangan harbiy bo‘lmagan xodimlarga rahbarlik qilgan. 2012-yildan 2015-yilgacha Milliy xavfsizlik kengashida Afg‘oniston va Pokiston hamda Yaman yo‘nalishlarini boshqargan. Baydenning maxsus maslahatchisi bo‘lgan.

Afg‘oniston bo‘yicha avvalgi maxsus vakil Xalilzod Donald Tramp tomonidan 2018-yilda tayinlangan edi. Undan oldin, sobiq prezident kichik Jorj Bush davrida Xalilzod BMTdagi doimiy vakil, shuningdek, Iroqdagi (2005—2007-yillar) va Afg‘onistondagi (2003—2005-yillar) elchi bo‘lgan.

U 18-oktabr kuni o‘z iste’fosi haqida e’lon qildi. Blinkenga yo‘llagan xatida u hozir uning ketishi uchun ayni vaqt ekanini, chunki AQSh Afg‘onistonga nisbatan siyosat olib borishning yangi bosqichiga kirayotganini aytgan.

U o‘z xatida yozishicha, afg‘on hukumati va “Tolibon” o‘rtasidagi kelishuvlar dastlab ko‘zda tutilgani kabi amalga oshirilmagan. Xalilzod voqealarning bunday tus olishi sabablari haqidagi fikrlari bilan yaqin kelajakda bo‘lishishga va’da berdi.

Eslatib o‘tamiz, “Tolibon” Afg‘onistonni avgust o‘rtalarida egallab oldi. Ular Bayden mamlakatdan Amerika qo‘shinlari olib ketilishini e’lon qilganidan keyin, apreldan buyon hujumlarni olib borayotgan edi. O‘z qo‘shinlarini chiqarib ketish haqidagi kelishuvni AQSh “Tolibon” bilan o‘tgan yil fevralida imzolagan edi.

“Tolibon” BMTga Afg‘onistonda bolalarni poliomiyelitga qarshi emlashga ruxsat berdi

Jahon sog‘liqni saqlash tashkiloti (JSST) “Tolibon” rahbariyatining JSST va YuNISEFning Afg‘onistondagi bolalarni poliomiyelitga qarshi emlash bo‘yicha kampaniyasini qo‘llab-quvvatlash qarorini olqishladi.

Poliomiyelitga qarshi vaksinatsiya 8-noyabrda boshlanadi va uch yil ichidagi birinchi shunday aksiyaga aylanadi.

Keng ko‘lamli kampaniya natijasida qariyb 3 million bola emlanishi kutilmoqda. JSST eslatishicha, poliomiyelit falajlik va o‘limga olib kelishi mumkin bo‘lgan xavfli kasallikdir. Infeksiyadan ishonchli himoya uchun og‘izga tomiziladigan vaksinani bir nechta dozada olish kerak.

Ta’kidlanishicha, poliomiyelitga qarshi immunizatsiyani amalga oshirish imkoniyatiga BMT va “Tolibon” vakillari o‘rtasidagi muzokaralar natijasida erishilgan. Tomonlar qizamiq va koronavirusga qarshi vaksinatsiyani ham qayta tiklashga kelishgan.