18-oktabr kuni O‘zbekistonga Pfizer/BioNTech vaksinasining 526 500 dozalik yana bir partiyasi olib kelindi, deb xabar beradi SSV matbuot xizmati.
Eslatib o‘tamiz, 13-sentabr kuni O‘zbekistonga 1,2 million dozadan ortiq Pfizer vaksinasi keltirilgan edi. Ayni vaqtda mamlakatga olib kelingan Pfizer/BioNTech vaksinasining umumiy miqdori 1726 500 dozaga yetdi.
Shunday qilib, O‘zbekistonda emlash boshlanganidan beri keltirilgan vaksina miqdori esa 29 214 488 dozani tashkil qilmoqda.
Ma’lumot uchun, mamlakatda ota-onalar va vasiylarining roziligi asosida ixtiyoriy ravishda 12 yoshdan katta bolalarni ham Pfizer/BioNTech vaksinasi bilan emlashga ruxsat berilgan. 14-oktabr holatiga ko‘ra, yurtimizda 151 124 nafar 12 yoshdan 18 yoshgacha bo‘lgan bolalar Pfizer vaksinasi bilan ixtiyoriy ravishda emlangan.
Mavzuga doir: O‘zbekistonda koronavirusga qarshi kurashish va vaksinalar sotib olish uchun qo‘shimcha 1,3 trln so‘m ajratildi
Avvalroq O‘zbekistonga oktabr oyida yana 800 ming doza Pfizer va 1,7 mln doza Sinovac olib kelinishi, yil oxirigacha mamlakatga keltiriladigan vaksinalar soni 47 million dozadan oshishi rejalashtirilgani to‘g‘risida xabar berilgandi.
