O‘zbekistonga 2021-yil oktabr oyida COVAX dasturi doirasida Pfizer-BioNTech vaksinasidan 800 ming doza va Sinovac vaksinasidan 1,7 million doza olib kelish ko‘zda tutilgan, deb xabar beradi SSV matbuot xizmati.
Ma’lum qilinishicha, Sanitariya-epidemiologik osoyishtalik va jamoat salomatligi xizmati ma’lumotiga ko‘ra, mamlakatning o‘zida 15,5 million doza ZF-UZ-VAC2001 hamda 633 ming dozadan ortiq ikki komponentli “Sputnik V” vaksinalari ishlab chiqarilishi rejalashtirilgan.
Umumiy hisobda 18,9 million dozadan ortiq vaksina kelgusida emlash jarayonlarida qo‘llash uchun Sanitariya-epidemiologik osoyishtalik va jamoat salomatligi xizmatiga yetkaziladi.
Hozir O‘zbekistonda emlash boshlanganidan beri 28 687 988 doza vaksina keltirilgan bo‘lib, yil oxirigacha bu ko‘rsatkich 47 million dozadan oshishi rejalashtirilgan.
“Ushbu miqdor bilan O‘zbekiston aholisining 17,4 million nafarini to‘liq emlash mumkin bo‘ladi”, — deyiladi xabarda.
Eslatib o‘tamiz, 13-sentabr kuni O‘zbekistonga 1,2 million dozadan ortiq Pfizer vaksinasi, 13-oktabr kuni esa Turkiyadan 200 ming doza Sinovac vaksinasi olib kelingandi.
Mavzuga doir: Abdulaziz Komilov: “AQSh 5 mln dozadan ortiq Moderna va Pfizer vaksinalarni beg‘araz taqdim etganidan minnatdormiz”
Izoh (0)