Buyuk Britaniyadagi supermarketlarda oziq-ovqat mahsulotlari tugab bormoqda, chunki britaniyaliklar taklif yetishmasligi tufayli mahsulotlarni zaxiralab qo‘ymoqda. Milliy statistika boshqarmasi ma’lumotiga ko‘ra, vahima bilan mahsulotlarning keragidan ortiq sotib olinishi tufayli 25-sentabrdan 9-oktabrgacha mamlakatda har oltinchi odamga asosiy oziq-ovqat mahsulotlari yetmay qolgan.

Foto: The UK.one

9-oktabr kuni ijtimoiy tarmoqlarda go‘sht, mevalar va muzlatilgan mahsulotlarning bo‘shab qolgan peshtaxtalarini aks ettiruvchi ko‘plab fotosuratlar tarqaldi. Bundan tashqari suratlarda aravachalarni hojatxona qog‘ozi va suvli idishlar bilan to‘ldirib olgan mijozlarni ko‘rish mumkin. Yuz minglab mijozlar Rojdestvo kunidagi tushlik va kechki ovqat uchun 25-dekabrga taom yetkazib berish xizmatiga allaqachon buyurtma berib qo‘ygan, britaniyaliklarning har uchdan biri oziq-ovqat mahsulotlarini zaxiralashni boshlagan.

The Grocer jurnali 1000 iste’molchi orasida so‘rov o‘tkazib, ularning uchdan ikki qismi Rojdestvo arafasida oziq-ovqat va ichimlik yetishmay qolishidan “xavotirda” yoki “chuqur tashvishda” ekanini aniqladi.

Supermarketlar haydovchilar yetishmasligi tufayli ta’minotdagi uzilishlar va peshtaxtalarning bo‘shab qolishiga qarshi kurashmoqda. Transport sohasiga yana 100 ming xodim zarur, chunki Brexit’dan keyin va pandemiya davrida mehnat muhojirlari mamlakatdan keng miqyosda chiqib ketgan. Ishchilarning yetishmasligi mehmonxona biznesi, qishloq xo‘jaligi va oziq-ovqat sanoatiga ham ta’sir ko‘rsatdi. Bundan tashqari, mamlakatda elektr narxining ko‘tarilishi tufayli ko‘plab o‘g‘it ishlab chiqaruvchilar o‘z faoliyatini to‘xtatishga majbur bo‘ldi, bu esa go‘sht, parranda go‘shti va qadoqlangan oziq-ovqat tanqisligini keltirib chiqarmoqda.

Britaniya hukumati ushbu muammolarni hal qilish bo‘yicha choralar ko‘rmoqda — yaqinda harbiylarni mahsulot yetkazib berishga safarbar qilish boshlandi. Qayd etilishicha, hukumat harbiylarga bayram kunlari ham oziq-ovqat mahsulotlarini yetkazib berishni buyurishi mumkin.