Dunyo va o‘zbek sportiga oid 6-oktabr kunining eng muhim xabarlari dayjesti bilan tanishing.

O‘zbekiston

Ayollar o‘rtasidagi Jahon chempionatiga Istanbul mezbonlik qiladi

AIBA ayollar o‘rtasidagi 2021-yilgi Jahon chempionati Turkiyaning Istanbul shahrida o‘tkazilishini e’lon qildi, deb yozmoqda Milliy olimpiya qo‘mitasi matbuot xizmati.

Qayd etilishicha, musobaqa dekabr oyida bo‘lib o‘tadi. Bahslarning aniq sanasiga yaqin kunlar ichida aniqlik kiritiladi.

Ushbu Jahon chempionatining mukofot jamg‘armasi 2,4 million AQSh dollarini tashkil etadi. Oltin medal sohibalari 100 ming, kumush 50 ming, bronza egalari esa 25 ming dollardan mukofot puliga ega chiqadi.

Eslatib o‘tamiz, erkaklar o‘rtasidagi Jahon chempionati bahslari 25-oktabrdan 6-noyabrgacha bo‘lgan muddat ichida Serbiyaning Belgrad shahrida o‘tkaziladi.

Jahon

“Barselona”da qishki transferlar oynasi uchun atigi 20 million yevro bor

Foto: Twitter

“Barselona” qishki transferlar oynasida transferlar uchun atigi 20 million yevro sarflay oladi. Bu haqda Diario Sport xabar bermoqda.

Nashrga ko‘ra, agar qaysidir futbolchi klubni tark etsa, bu miqdor oshishi ham mumkin. Jamoa hujum va himoya (qanot) chizig‘iga yangi futbolchilarni taklif qilish ustida ishlamoqda.

Avvalroq klubning “Manchester Siti” vingeri Rahim Sterling va “Leypsig” yarim himoyachisi Dani Olmoga jiddiy qiziqish bildirayotgani haqida xabarlar tarqalgan edi.

Terma jamoadan oladigan barcha mukofot pullarini xayriyaga sarflaydigan Mbappe

Foto: Twitter

“PSJ” hujumchisi Kilian Mbappe Fransiya terma jamoasidan oladigan barcha mukofot pullarini xayriya ishlariga sarflaydi.

Mbappe to‘rt yil davomida umumiy hisobda 1,5 million yevroga yaqin mablag‘ni xayriya uchun sarflagan, deb yozadi GFFN.

Mbappe Fransiya terma jamoasida debyut o‘yinini 2017-yilning mart oyida o‘tkazgan. U “uchranglilar” safida 49 o‘yinda 17 ta gol urgan va 2018-yilgi Jahon Chempionati g‘olibi bo‘lgan.

Aql tishi pand berib qolgan Kazemiro

Foto: Twitter

“Real” yarim himoyachisi Kazemiro JCh—2022 saralashi doirasida Braziliya terma jamoasining oktabr oyidagi o‘yinlarini o‘tkazib yuboradi.

Mamlakat futbol konfederatsiyasining yozishicha, 29 yoshli futbolchi aql tishining yallig‘lanishi tufayli Madridda qolishga majbur bo‘lgan. Yarim himoyachi kamida besh kun davomida mashg‘ulotlarda qatnasha olmaydi, shifokorlar unga dam olishni tavsiya etgan.

Braziliya 8-oktabr sanasida Venesuela, 11-oktabrda Kolumbiya, 15-oktabrda esa Urugvay bilan o‘yin o‘tkazadi.

Maoshining ko‘tarilishini xohlayotgan Saloh

Foto: Twitter

“Liverpul” vingeri Muhammad Salohning yangi shartnomaga ko‘ra qancha maosh olishni xohlayotgani ma’lum bo‘ldi.

The Independent xabariga ko‘ra, 29 yoshli misrlik futbolchi haftasiga 300—380 ming funt olishni xohlamoqda. Qayd etish kerak, Saloh bu orqali Angliya Premyer Ligasining eng ko‘p maosh oluvchi futbolchilaridan biriga aylanadi.

Saloh hozirda “Liverpul” bilan 2023-yilgacha amal qiladigan shartnomasiga ko‘ra, haftasiga 200 ming funt maosh oladi.

“Real” Mbappega yiliga 40 million yevro maosh taklif qildi

Foto: Twitter

“Real Madrid” “PSJ” hujumchisi Kilian Mbappega 6 yillik shartnoma taklif qildi, futbolchining yillik maoshi esa yiliga 40 million yevroga yaqin bo‘ladi.

Jurnalist Nikolo Skiraning xabar qilishicha, Madrid klubi mavsum oxiriga borib, 22 yoshli futbolchini erkin agent sifatida qo‘lga kiritishiga ishonmoqda.

Biroq “PSJ” ham Mbappeni o‘z safida ushlab qolmoqchi va u bilan yangi shartnoma imzolash ustida ishlamoqda. Tomonlarning amaldagi kelishuvi 2022-yilning 30-iyun sanasida o‘z nihoyasiga yetadi.

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!