Qashqadaryoda MIB xodimlari tomonidan 2021-yilning o‘tgan davri mobaynida qarzdorlardan 826 milliard so‘m mablag‘ undirilib, shuning salkam 25 milliard so‘mi “temir daftar” “ayollar” va “yoshlar” daftarida ro‘yxatda turuvchi kam ta’minlangan oilalarga tarqatilgani ma’lum bo‘ldi. Bu haqda MIBning viloyat boshqarmasi boshlig‘i Odil Poyonov ma’lum qildi, deya xabar berdi “Daryo” muxbiri.

Foto: “Daryo”

Ta’kidlanishicha, 25-sentabr kuni MIBning viloyat boshqarmasida hududda faoliyat yurituvchi jurnalist va blogerlar uchun matbuot anjumani tashkil etilgan.

“Joriy yilning o‘tgan davri mobaynida kelib tushgan 106 866 ta 1 trillion 761 milliard so‘mlik hujjatning ijrosi ta’minlanib, amalda 826 milliard so‘m undirildi. Shundan soliq qarzdorligi bo‘yicha 685 milliard, jinoiy va ma’muriy jarimalar bo‘yicha 25 milliard, davlatga yetkazilgan zarar bo‘yicha 7,3 milliard va davlat boji bo‘yicha 35 milliard so‘mlik hujjatlar tamomlangan. Davlat foydasiga undiruv o‘tgan yilning shu davriga nisbatan 290 milliard so‘mga ko‘p bajarilgan. Undirilgan mablag‘larning 24,5 milliard so‘mi Prezidentimiz tashabussi bilan tashkil etilgan ‘temir daftar’, ‘ayollar daftari’ va ‘yoshlar daftari’ga kiritilgan fuqarolarni ijtimoiy qo‘llab-quvvatlash uchun yo‘naltirilgan”, — deydi Odil Poyonov.

Qayd etilishicha, yil boshidan 485 ta 444,7 milliard so‘mlik mulk savdoga chiqarilgan va 100 ta 15,5 milliard so‘mlik mulk elektron-onlayn auksion orqali sotilib, sotuvdan tushgan mablag‘lar undiruvchilarga o‘tkazib berilgan.

“Misol uchun qarzdor ‘Kesh original servis’ MChJning soliq qarzini undirish haqidagi ijro hujjati bo‘yicha tashkilot binosi savdoga chiqarilib, 117 million so‘mga sotildi va tushgan mablag‘ soliq qarzini so‘ndirishga yo‘naltirildi”, — deydi matbuot anjumanida so‘z olgan mas’ul.

Ta’kidlanishicha, davlat daromadiga o‘tkaziladigan mol-mulklar undiruvi bilan bog‘liq 1164 ta 1 milliard 346 million so‘mlik ijro hujjatidan 1012 ta 1 milliard 293 million so‘mligi tamomlangan. 353 ta hujjat belgilangan tartibda yo‘q qilingan.

“Masalan, Qarshi tumani ma’muriy sudi qaroriga asosan, huquqbuzar Qodirovga nisbatan ma’muriy ish bo‘yicha ashyoviy dalil deb e’tirof etilgan 23 ming dona pirotexnika vositasi tegishli tashkilot vakillari ishtirokida yo‘q qilindi”, — deydi boshqarma boshlig‘i.

Matbuot anjumanida qo‘shimcha qilinishicha, jinoiy jarimalar undiruvi bilan bog‘liq 192 ta 2,7 milliard so‘mlik ijro hujjatlaridan 118 ta 1,8 milliard so‘mligi tamomlangan. 33 nafar qarzdor ixtiyoriy muddatda jarimani to‘lamaganligi uchun ularning jazosi boshqa turdagi jazoga almashtirilgan. Davlat boji undiruvi bilan bog‘liq 26 922 ta 45,5 milliard so‘mlik ijro hujjatidan 16 066 ta 35,1 milliard so‘mligi tamomlanib, davlat budjetiga o‘tkazilgan.