Ohangaronda 13-sentabr kuni “O‘zmetkombinat” AJga qarashli “Lida metall” korxonasi metall eritish pechida kuchli yong‘in sodir bo‘lib, bir necha xodim jarohat olgani to‘g‘risidagi xabar ijtimoiy tarmoqlarda tarqaldi. Unda kombinat rahbariyati ishlab chiqarishdagi baxtsiz hodisani yashirib, tegishli hisobotga kiritmagan va ro‘yxatga olmaganligi bildirilgan. Jarohatlangan xodimlar ham ma’muriyat tazyiqi bilan shifoxonaga olib borilmay uyida davolanmoqda, degan ma’lumotlar keltirilgan.

Foto: Videodan kadr

Kombinat axborot xizmati ma’lum qilishicha, ushbu hodisa aslida 11-sentabr kuni soat 01:15 da sodir bo‘lgan. Pechda eritilgan metallning kimyoviy tarkibidagi uglerod miqdori 0,93 foizni tashkil etgan va bu holatda ko‘zda tutilganidek, uglerod miqdorini kamaytirish uchun pechga kislorod yuborilgan.

“Videoda tasvirlangan holat texnologik jarayonga kiradi va mazkur hodisada tan jarohati olgan deb aytilgan Nuriddin Haydarov va boshqa ishchilar aslida hech qanday tan jarohati olmagan va shu kunning o‘zida ishlarini davom ettirgan va bugungi kunda ham salomatligi yaxshi”, — deb ta’kidlangan “O‘zmetkombinat” xabarida.

Sanoat xavfsizligi davlat qo‘mitasi ham voqea aynan shunday bo‘lganini tasdiqladi. Smena texnologi topshirig‘iga asosan zudlik bilan pechdagi metallga kislorod yuborilgan vaqt suyuq metall harorati belgilangan miqdordan ko‘proq bo‘lgani va suyuq metall kislorodga to‘yingan bo‘lganli uchun texnologik qayt (vibros) sodir bo‘lgan.

Qo‘mita xabariga ko‘ra, ushbu ma’lumotga aniqlik kiritish maqsadida 22-sentabr kuni qo‘mita raisining topshirig‘i bo‘yicha “Lida metall” korxonasiga borgan Toshkent viloyati hududiy boshqarma boshlig‘i voqea guvohlaridan tushuntirish xatlari ham olgan. Tushuntirish xatlarida kombinat smena ustasi va pech atrofidagi ishchi xodimlarga hech qanday tan jarohatlar yetmagani, faqat smena ustasining quloq qismi issiqlik ta’sirida qizargani va 11-sentabr kuni ular ishini odatdagi holatda davom ettirgani ko‘rsatilgan.

O‘rganish natijasiga ko‘ra, texnologik qayd natijasida korxonadagi injener va ishchi xodimlarning sog‘lig‘iga yoki korxonaga moddiy zarar yetkazilmagani aniqlangan.

“Sanoat xavfsizligi davlat qo‘mitasi xodimlari tomonidan sodir bo‘lgan hodisa texnologik jarayonning buzilishi bo‘lib, o‘rganish natijasiga ko‘ra tegishli choralar ko‘riladi”, — deyiladi xabarda.