O‘zbekistonda 24-sentabr kuni A toifali Volkswagen Caddy avtomashinalarining birinchi bosqichini hududiy sog‘liqni saqlash boshqarmalari tizimidagi tez tibbiy yordam shoxobchalariga yetkazib berish boshlandi. Bu haqda Sog‘liqni saqlash vazirligi xabar berdi.
Ma’lum qilinishicha, Prezidentning 27-maydagi tegishli qaroriga binoan tez tibbiy yordam xizmati uchun yangi va zamonaviy rusumdagi tez tibbiy yordam avtomashinalarini xarid qilish belgilangandi. Shunga muvofiq, vazirlik hamda Jizzax avtomobil zavodi o‘rtasida tez tibbiy yordam mashinalarini yetkazib berish bo‘yicha shartnoma imzolangan.
Qayd etilishicha, 2020-yilda Toshkent shahar tez yordam stansiyasiga 150 dona Ford rusumli reanimatsion tibbiy apparatlar bilan jihozlangan avtomashina xarid qilingan. Bundan to‘rt yil avval tizimda reanimobillar soni atigi 24 ta bo‘lgan.
Hozirda tez yordam xizmatida 435 ta reanimobil bo‘lib, 13 ming nafar aholiga bitta avtomashina to‘g‘ri kelmoqda. Shu bilan birga, tez yordam brigadalari dislokatsiyasi qayta ko‘rib chiqilib, aholi yashash punktlariga yanada yaqinlashtirilgan. Tez yordamning kechikishi 10–12 foizdan 1–2 foizgacha kamaygan. 2016-yilda chaqiriqlarga yetib borish vaqti o‘rtacha 25–30 daqiqa bo‘lgan bo‘lsa, hozirga kelib 8–12 daqiqani tashkil qilmoqda.
Xabar qilinishicha, zamonaviy avtomashinalar mamlakatning barcha hududlariga teng taqsimlanadi. Bu avtotransport vositalari xalqaro talablarga to‘la mos kelib, uning ichki qismi bemor va tibbiy xodimlarning qulay joylashishi imkonini beradi.
Qolaversa, maxsus mashina aynan qaysi tibbiy yo‘nalishda foydalanilishiga qarab jihozlanishi mumkin. Shuningdek, avtomashinalar shahar sharoitida harakatlanish bo‘yicha yuqori texnik ko‘rsatkichlarga ega bo‘lib, o‘tuvchanligi, ishonchliligi hamda tejamkorligi bilan alohida ajralib turadi. Eng muhimi, bu mashinalarda harakatni to‘xtatmay turib ham bemorga zarur tibbiy yordam ko‘rsatish mumkin.
Izoh (0)