Rossiyaning Moskva viloyati Sergiyev Posad tumani Bujaninovo qishlog‘ida keksa ayolning o‘ldirilishi munosabati bilan 13-sentabr kuni muhojirlarga qarshi rejalashtirilmagan miting bo‘lib o‘tdi. Bu haqda Meduza xabar berdi.
Foto: Sergiyev Posad shahar okrugi ma’muriyati
13-sentabr kuni “Kopeyka” va “Alternativnaya gazeta” mahalliy nashrlari Bujaninovo hududida, taxminan, 65 yoshli ayol zo‘rlangani va o‘ldirib ketilgani haqida mushtariylardan kelgan xabarlarini e’lon qilgan (keyinchalik rasmiylar ayol 67 yoshda bo‘lganini aniqladi). Ayolning jasadi o‘rmondagi temiryo‘l yaqinidan topilgan. Xabarlarga ko‘ra, qotillikda gumon qilinib, ikki muhojir hibsga olingan. “Kopeyka” va “Alternativnaya gazeta” manba ko‘rsatmasdan, gumonlanuvchilarning fotosuratlarini chop etdi.
Bujaninovodagi mitingda kamida 200 kishi qatnashdi. Ular politsiya boshlig‘i bilan uchrashishni va muhojirlarga ajratilgan yotoqxonani yopishni talab qildi. “Kopeyka” xabariga ko‘ra, 13-sentabr 18:00 dan keyin Bujaninovoda odamlar chet ellik ishchilarini joylashtirish uchun “Ekookna” kompaniyasi tomonidan sotib olingan ikki qavatli uy yoniga yig‘ila boshlagan (rasmiylarga ko‘ra, bu bino avval qishloq klubi bo‘lgan). Baza nashri miting ishtirokchilari sonini 200 kishi deb, “Alternativnaya gazeta” muallifi Andrey Trofimov esa 300 kishi deb (23:00 holatiga ko‘ra) baholadi. “Kommersant” guvohlarga tayanib yozishicha, miting ishtirokchilari eng avj pallada ming kishiga yetgan.
“Alternativnaya gazeta” e’lon qilgan videoga qaraganda, o‘ldirilgan ayolning o‘g‘li ham mitingda qatnashgan. U yotoqxona komendantidan uni ichkariga kiritishni talab qilgan: “Siz o‘ldirib ketilgan onam bilan deyarli tengsiz-ku”. Mitingga kelgan yosh qizlarning aytishicha, muhojirlar ularga shilqimlik qilgan; ayollar bolalarini tashqariga chiqarishdan qo‘rqishini aytdi. Miting ishtirokchilaridan birining so‘zlariga ko‘ra, odamlar 13-sentabrga o‘tar kechasi yotoqxonaga kelishgan: “Biz bu yerda ertalab soat beshgacha turdik, birorta boshliq chiqib, hammasini tushuntirib berishini kutdik. Hech kim chiqmadi”. “TASS”ning huquq-tartibot idoralaridagi manbasi aytishicha, 13-sentabrga o‘tar kechasi kimdir yotoqxona eshigini buzmoqchi ham bo‘lgan.
Yotoqxona politsiya himoyasiga olindi. Tergov qo‘mitasi nafaqaxo‘rning zo‘rlanishi va o‘ldirilishida gumonlanayotganlar ushlanganini tasdiqladi. Ular “qo‘shni davlatlardan birining fuqarolari”, 1988- va 1984-yillarda tug‘ilgan ikki kishi, deyiladi idorada. Sergiyev Posad shahar okrugi rahbari Mixail Tokaryevning aytishicha, gap “Priozernoye” bog‘dorchilik shirkatidagi xususiy uy qurilishida ishlab va shu yerda yashab kelayotgan Tojikistonning ikki fuqarosi haqida ketmoqda. 14-sentabr kuni ertalab Tergov qo‘mitasi gumondorlarga nisbatan ayblov e’lon qilingani haqida xabar berdi. Shu bilan birga, miting paytida Bujaninovo aholisi jinoyatga uch nafar xorijlik aloqadorligi va go‘yoki ulardan biri qochishga muvaffaq bo‘lganini aytdi. Voqea joyiga yetib kelgan politsiya bu haqda izoh bermagan.
Bujaninovodagi miting 14-sentabr kuni yarim tunda, Sergiyev Posad ma’muriyati bilan uchrashuvdan so‘ng tugadi. Ma’muriyat muhojirlar yotoqxonasini yoptirishga va’da berdi. “Aziz yurtdoshlar! Men sizni to‘xtashga chaqiraman. Millatidan kelib chiqib odamlarni sudsiz jazolash — bu yirik tajovuzni keltirib chiqaradigan xato. Jinoyatda gumonlanayotganlar adliya qo‘lida. Biz Bujaninovo aholisining talablarini tingladik: 14-sentabr kuni yotoqxona egasi bilan uchrashuv o‘tkazamiz va uning yopilishini talab qilamiz”, — deya va’da qildi shahar okrugi rahbari Mixail Tokaryev. Uning o‘rinbosari Oksana Yeroxanovaning qo‘shimcha qilishicha, politsiya Bujaninovo ko‘chalarida patrullik qilish uchun kuchlar yuboradi. Hokimiyat, shuningdek, sobiq qishloq klubi binosining “Ekookna” kompaniyasiga qonuniy yoki boshqa yo‘l bilan o‘tkazilganini tekshiradi.
Keyinroq Meduza xabar berishicha, Podmoskovye gubernatori Andrey Vorobyov Bujaninovodagi muhojirlar uchun mo‘ljallangan yotoqxonani yopishni buyurgan. “Shunday jinoyatlar borki, ular o‘z beadabligi bilan, shafqatsizligi bilan rezonansga olib keladi va natijada haqiqatdan ham odamlarning qoni qaynaydi. Bujaninovodagi atrofida ushbu falokat sodir etilgan yotoqxona bugun yopiladi. Aholi qarshi ekan unga bu yerda joy yo‘q”, — deyiladi gubernatorning Telegram’dagi rasmiy kanalida.
“Alternativnaya gazeta” muallifi, bloger Andrey Trofimovning aytishicha, unga Bujaninovodagi tartibsizliklarni yoritgani uchun jinoiy ish qo‘zg‘atish bilan tahdid qilishgan. “Menga Moskva viloyati hukumati va turli tuzilmalar qo‘ng‘iroq qildi va ular ushbu miting uchun meni aybdor qilib, millatlararo adovatni qo‘zg‘atish bo‘yicha jinoiy ish ochmoqchiligini aytdi. Tabiiyki, men hech qanday kelishmovchilikni qo‘zg‘amayman. Men faqat fuqarolarga o‘z muammolari, istaklari va xavotirlarini hukumatga yetkazish imkoniyatini beraman”, — dedi Trofimov yotoqxona yaqinidagi mitingdan olgan reportajida.
2019-yilning mart oyida Rossiya tarkibiga kiruvchi Yoqutiston Respublikasida ham muhojirlarga qarshi mitinglar bo‘lib o‘tgan. Mitinglar kelib chiqishi qirg‘izistonlik bo‘lgan muhojir bir ayolni zo‘rlashda ayblanganidan keyin boshlangan. Namoyishlar fonida muhojirlarga tahdid va hujumlar haqida xabarlar kelib tushgan, bu esa muhojirlarning ishga chiqishdan bosh tortishiga sabab bo‘lgan. Yoqutiston rahbari Aysen Nikolayev respublika aholisi bilan uchrashib, noqonuniy immigratsiya va noqonuniy biznes bilan kurashishga va’da berdi. Ko‘p o‘tmay u respublikaning 33 xil sohadagi korxonalariga chet el fuqarolarini yollashni vaqtincha taqiqlab qo‘ydi.
