Jahon sog‘liqni saqlash tashkiloti (JSST) bayonotiga ko‘ra, COVID-19 ga qarshi vaksinalarni g‘amlab qo‘yish pandemiyani uzaytirishga yordam beradi. Bu haqda CNBC telekanali xabar berdi.
“Bu faqat adolatsizlik, axloqsizlik emas, bu pandemiyani ham uzaytirmoqda”, — dedi JSSTning shoshilinch kasalliklar bo‘limi texnik guruhi rahbari Mariya Van Kerxov.
BMT ma’lumotlariga ko‘ra, Yevropa Ittifoqi o‘z aholisining 57 foizini to‘liq emlagan hamda Fransiya va Buyuk Britaniyada qo‘shimcha dozalar bilan emlashni joriy qilgan. Afrika esa o‘z aholisining atigi 3 foizini koronavirusga qarshi to‘liq emlagan, deya xabar beradi telekanal.
4-avgust kuni JSST qayta emlashga moratoriy talab qilgandi. Tashkilot sentabr oxirigacha dunyo aholisining 10 foizini koronavirusga qarshi emlashga erishish uchun boy davlatlardan ortiqcha vaksinalarni kambag‘al mamlakatlarga berishni so‘ragan. JSST rejasiga ko‘ra, dekabrda dunyo aholisining 40 foizi emlanib bo‘lishi kerak.
Shuningdek, JSST rahbari vaksina ishlab chiqaruvchilarga eng kambag‘al mamlakatlarga dori-darmon yetkazib beruvchi COVAX dasturiga e’tibor qaratishni tavsiya qildi.
AQSh hukumati JSSTning koronavirusga qarshi qayta emlashga moratoriy joriy etish taklifini “noto‘g‘ri tanlov” deb atadi. Oq uy matbuot kotibining so‘zlariga ko‘ra, AQShda vaksinalar yetarli. Shuningdek, Amerika Qo‘shma Shtatlari, agar kerak bo‘lsa, o‘z mamlakatida revaksinatsiya dasturini to‘xtatmasdan ham, vaksinaga muhtoj mamlakatlarga qo‘shimcha dozadagi preparatlarni taklif qilishi mumkin.
Izoh (0)