2021-yilning bahorida 712 ot kuchiga ega RAM 1500 TRX pikapida Pensilvaniyadagi irmoq ustidan sakrab o‘tgan bloger suv havzalari chegarasini buzish, ularni ifloslantirish va noto‘g‘ri foydalanishda aybdor deb topildi. 18 ta jinoiy ish bo‘yicha jami 53 ming dollar jarima belgilangan. Ta’kidlanishicha, bloger jarimaning barchasini to‘lab bo‘lgan va reabilitatsiyani tezlashtirish dasturiga qo‘shilgan, deb xabar beradi Motor.
Pensilvaniyada suv havzalari chegarasini buzish, ularni ifloslantirish va noto‘g‘ri foydalanish Summary Offence deb ataluvchi jinoiy javobgarlik bilan jazolanadi.
E’lon qilingan videoda bloger Ram 1500 TRX’ni Pensilvaniya shtatidagi o‘rmonlarning birida sinovdan o‘tkazgan. Test-drayv vaqtida erkak katta tezlikda suv to‘siqlarini bosib o‘tgan, shuningdek, irmoq ustidan sakrashni amalga oshirgan. Bu kabi tryuklarning birida avtomobilning hatto orqa oynasi ham sinib ketgan.
Video e’lon qilinganidan so‘ng shtatning Baliqchilik bo‘yicha komissiyasi blogerning ustidan shikoyat qilgan. Ularning fikricha, erkak atrof muhitga jiddiy zarar yetkazgan. Idora vakillarining ma’lum qilishicha, sinov vaqtida video muallifi suv hududiga noqonuniy kirgan, irmoq yaxlitligini buzgan, shuningdek, mahalliy fauna olamini yakson qilgan. Endilikda erkak katta miqdorda jarimaga tortilishi mumkin. Bundan tashqari, blogerga nisbatan atrof-muhit himoyasi to‘g‘risidagi qonunni buzganligi uchun 18 ta jinoyat ishi ochilgan.
Blogerning ma’lum qilishicha, u ekstremal videoni shaxsiy hududda suratga olgan bo‘lib, suratga olish ishlarini yer egasi bilan kelishib olgan.
Izoh (0)