Tokioda o‘tgan yana bir sermahsul kun, ijaraga berilgan Jasur Yaxshiboyev, “Real”ga o‘tishi uchun 1 kun qolgan Mbappe. Eng so‘nggi sport yangiliklari

Dunyo va o‘zbek sportiga oid 30-avgust kunining muhim xabarlari dayjesti bilan tanishing.

O‘zbekiston

Tokioda Paralimpiya o‘yinlari o‘tkazilmoqda. 30-avgust kuni o‘zbekistonlik sportchilar 3 ta medalni qo‘lga kiritdi. Para-yengil atletikaning F41 klassida yadro uloqtirish bahslarida Boburjon Omonov 14,06 metr natija qayd etgan holda paralimpiya rekordini yangiladi va oltin medalni qo‘lga kiritdi.

Para-yengil atletikaning F54 toifasida yadro uloqtirish bo‘yicha Nurxon Qurbonova 7,77 metr natija qayd etib, bronza medaliga ega chiqdi. Shohsanam Toshpo‘latova esa para-suzish bo‘yicha bronza medalini o‘ziniki qildi.

Polshaning “Legiya” klubi sharafini himoya qilayotgan Jasur Yaxshiboyev jamoasini o‘zgartirdi. “Championat.asia” nashrining “Legia.net” saytiga tayanib yozishicha, Yaxshiboyev Chexiyaning “Dinamo Cheske Budeyovitse”siga ijaraga berilgan. Qayd etish o‘rinli, Jasur 2020-yilning qishida Polsha klubiga o‘tgandi, o‘tgan vaqt oralig‘ida u deyarli o‘yin amaliyotiga ega bo‘lmadi.

Jahon

Krishtianu Ronaldu “Manchester Yunayted” uchun tibbiy ko‘rikdan o‘tdi, deb yozmoqda Sky Sports.

Xabarda aytilishicha, Manchester klubiga qaytgan 36 yoshli portugaliyalik “qizillar” bilan 2 yillik bitim imzolaydi. Shuningdek, shartnomaga uni yana bir yilga uzaytirish haqida band kiritiladi.

Ronaldu haftasiga 480 ming funt sterling bilan APLning eng ko‘p maosh oluvchi futbolchisiga aylanadi.

“Real” hamon Killian Mbappening transferidan voz kechgani yo‘q. Sky Sports jurnalisti Anjelo Manjantening yozishicha, “qirollik klubi” hujumchi uchun 200 million yevro taklif qilish imkoniyatini ko‘rib chiqmoqda.

Avvalroq Nikola Skira madridliklar Kilian uchun 215 million bermoqchiligi va futbolchining “Real” bilan 2027-yilgacha mo‘ljallangan shartnoma borasida kelishuvga erishgani haqida xabar bergandi. Ungacha “PSJ” “Real”ning 170+10 million yevrolik taklifini rad etgandi. Yozgi transfer oynasi 31-avgust kuni soat 00:00 da yopiladi.

“Manchester Siti” himoyachi Ruben Diash bilan amaldagi shartnomani uzaytirdi. “Shaharliklar” 24 yoshli portugaliyalik futbolchi bilan 2027-yilgacha mo‘ljallangan yangi bitimni imzolagan. Futbolchi o‘tgan mavsumda APLning eng yaxshi futbolchisi deb topilgandi.