O‘zbekistonda 2021-yil yakunigacha yana qancha davlat aktivlari ochiq savdoga chiqarilishi ma’lum bo‘ldi

Prezident Shavkat Mirziyoyev tadbirkorlar bilan bo‘lib o‘tayotgan ochiq muloqotda mutasaddilarga 2021-yil 1-noyabrga qadar har bir hududda kamida mingtadan yer maydonini sotuvga chiqarish bo‘yicha topshiriq berdi, deya xabar bermoqda “Daryo” muxbiri.

Bundan buyon davlat mulki obyektlarini, ular joylashgan yer bilan birga, yagona mulkiy majmua sifatida auksion orqali sotamiz. Binoni sotib olgan tadbirkorlar unga biriktirilgan yerga ham xususiy mulk huquqi asosida egalik qiladilar. Tasdiqlangan dasturga qo‘shimcha ravishda, yil yakuniga qadar yana 500 ta davlat aktivlari ochiq savdoga chiqariladi. Fursatdan foydalanib, hurmatli tadbirkorlarimizni ushbu savdolarda faol ishtirok etishga chaqiraman.

Yangi yer maydonlarini auksionga chiqarishdan oldin hudud rivojlanishining aniq rejasini tuzib olishimiz zarur. Ko‘plab rivojlangan davlatlar tajribasini o‘rganganimizda, birorta mamlakatda yer maydonlarini rejasiz berib yuborish mumkin emasligiga guvoh bo‘ldik. Oldin aniq hudud tanlab olinib, uning ‘master-plani’ ishlab chiqiladi.

Qayerda uy, qayerda maktab, qayerda ishlab chiqarish bo‘lishi aniq belgilanib, infrastruktura olib kelish rejasi tuziladi. Shundan keyingina yer uchastkalari aniq loyiha bilan savdoga chiqariladi.

Shuning uchun viloyat hokimlari kadastr va arxitektura idoralari bilan birga ushbu tajriba asosida ishlarni tashkil etishlari, aniq hududni belgilab, rejasini tasdiqlab, keyin yerlarni auksionga qo‘yishlari lozim.

Shuningdek, har bir viloyatda maxsus jamg‘armalar tashkil etiladi va yer maydonlarini sotishdan tushgan mablag‘ to‘liq tuman va shaharlar ixtiyorida qoldirilib, tadbirkorlar uchun infratuzilma yaratish va rivojlantirishga yo‘naltiriladi.

Qo‘chqorov, viloyat hokimlari va iqtisodiy kompleks bilan birga, joriy yil 1-noyabrga qadar har bir hududda kamida mingtadan yer maydonini sotuvga chiqarsin. Bundan tashqari, magistral yo‘llar bo‘yida loyiha asosida har bir hududdan kamida 200 tadan yer maydoni auksionga qo‘yiladi.

Shavkat Mirziyoyev, O‘zbekiston Prezidenti

Avvalroq O‘zbekistonda 2021-yilning birinchi yarmida davlat aktivlari jami 1,1 trillion so‘m (105 million dollar)ga sotilgani to‘g‘risida xabar berilgandi. Unga ko‘ra, 2021-yilning olti oyida obyektlarni sotishdan tushgan mablag‘larning aksariyati (80 million dollar) 10 ta yirik obyekt hisobiga to‘g‘ri keldi. Ichan qal’a mehmonxonasi va Davlat xavfsizlik xizmatining sobiq ma’muriy binosi shular jumlasidan. Shuningdek, 2021-yilda 900 dan ortiq davlat aktivlari sotuvga qo‘yiladi.