Milliy gvardiya qo‘mondoniga o‘rinbosar tayinlandi

Sarvar Mamayusupov tizimda yangi joriy qilingan Milliy gvardiya qo‘mondonining yoshlar bilan ishlash masalalari bo‘yicha o‘rinbosari lavozimiga tayinlandi, deb xabar bermoqda idora matbuot xizmati.

Tayinlovga qadar polkovnik Sarvar Mamayusupov 2020-yilning aprelidan buyon Milliy gvardiya qo‘mondonining tarbiyaviy va mafkuraviy ishlar bo‘yicha o‘rinbosari lavozimida ishlab kelayotgandi.

Sarvar Mamayusupov 1978-yilda Toshkent viloyatida tug‘ilgan. 2000-yilda Toshkent oliy umumqo‘shin qo‘mondonlik bilim yurti, 2007-yilda O‘zbekiston Qurolli Kuchlari akademiyasini tamomlagan.

Xizmat faoliyatini 2000-yilda Sharqiy harbiy okrug tarkibidagi harbiy qism maxsus vazifalar otryadi komandirining tarbiyaviy ishlar bo‘yicha o‘rinbosari sifatida boshlagan. 2007—2020-yillarda Mudofaa vazirligida tarbiyaviy va mafkuraviy ishlar bo‘yicha rahbarlik lavozimlarida ishlagan.

Eslatib o‘tamiz, 28-iyul kuni Shavkat Mirziyoyev barcha mehribonlik uylari va maxsus maktab-internatlarni Milliy gvardiya mas’ulligiga o‘tkazishni taklif qilgandi.