Toshkentda Prezident tashrifi arafasida qurilgan yangi bolalar maydonchasi buzilayotgani to‘g‘risida tarqalgan xabarlar rad etildi

Ijtimoiy tarmoqlarda Shavkat Mirziyoyevning 28-iyul kuni Toshkent shahridagi 21-Mehribonlik uyiga tashrifi arafasida bolalar maydonchasi uchun o‘rnatilgan konstruksiyalar tashrifdan keyin olib ketilayotgani aytilgan videolavha keng muhokamalarga sabab bo‘ldi. Toshkent shahar IIBB ushbu holat bo‘yicha izoh berdi.

Ma’lum qilinishicha, Yunusobod tumanida joylashgan “Matonat” mahallasi hududida “Obod mahalla” dasturi amal qilmoqda. Shu sababli bolalar maydonchasidagi eski konstruksiyalar zamonaviy, xavfsiz turlariga almashtirish maqsadida olib tashlanmoqda. Eski uchta konstruksiyalar o‘rniga yettita yangisini o‘rnatish, shuningdek, shiyponcha va bolalar uchun qumdon tashkil etish rejalashtirilmoqda.

Shuningdek, ushbu mahallada jami uchta bolalar maydonchalarini ta’mirlash ko‘zda tutilgan. 3-avgust kuni dasturi ijrosi doirasida “Matonat” mahallasida 80 nafar ishchi bo‘lgan, 4-avgust kuni esa jarayonni tezlashtirish maqsadida ishchilar soni 200 nafarga yetkaziladi.

“Bolalar maydonchasidagi o‘zgarishlar Prezidentning mazkur hududga yaqindagi tashrifi bilan bog‘liqligi haqidagi ma’lumot ham ishonchsizdir. Aslida davlat rahbarining yo‘nalishida ushbu hudud bo‘lmagan”, — deyiladi xabarda.