Туркияни бутунлай бошқа томондан очиб берувчи саёҳатбоп 6 маскан

Туркиянинг барчага таниш ва машҳур қадамжоларидан ташқари, яна шундай жойлари борки, кўплаб сайёҳлар учун қуйидаги маълумотлар қизиқ бўлиши аниқ.

Туркча Мальдив ороллари: Салда кўли

Мамлакатнинг жанубида, Бурдур вилоятида сайёҳлар ажойиб манзарадан — оқ қум ва Салда кўлининг мафтункор тоза сувларидан баҳраманд бўлишади. Анталиядан кўлга тахминан икки соатда етиб бориш мумкин. Табиатнинг мазкур мўъжизаси ўрмон ва тоғлар орасида жойлашган, шунинг учун бу ердаги ҳаво ҳарорати ҳар доим қирғоққа қараганда 7-10 даража паст бўлади.

Кўл, аслида, тоғ плиталаридаги ёриқларнинг тектоник келиб чиқишидан пайдо бўлган. Қум эса минерал гидромагнезитнинг табиий қатламидан ҳосил бўлган. Соҳил бўйида табиий лой ванналарини топиш мумкин: магний миқдори юқори бўлган оқ лой бўғимлар учун жуда фойдали. Ҳозирча бу ҳудуд сайёҳлар билан гавжум эмас, бу ерда беш юлдузли меҳмонхоналар йўқ, фақат чодирли лагерлар ва бир нечта кафе бор, холос.

Иссиқ булоқли курорт ва санаторийлар: Даламан, Ялова, Памуккале

Туркиядаги соғломлаштириш оромгоҳлари кўпчилик сайёҳлар учун ҳали яхши таниш эмас, аммо турклар орасида жуда машҳур. Эгей денгизи соҳили Даламан шаҳридаги минерал сув ва табиий лойлар неврологик, ошқозон ва юрак касалликларини даволайди, стресс ва сурункали чарчоқни кетказади. Булоқлар яқинидаги санаторийда даволаниш ёки пляж соҳилидаги меҳмонхонада яшаш ва муолажаларга бориш учун барча шароитлар етарли.

Ялова курорти Истанбул яқинида, табиий дендрологик паркда жойлашган. Бу ерда минерал булоқлари бўлган меҳмонхоналарни, шунингдек, йирик тиббиёт клиникаларини топиш мумкин. Сайёҳлар гинекологик муаммолар, буйрак ва тери касалликларини даволаш, иммунитетни яхшилаш ва асаб тизимини мустаҳкамлаш учун Яловага боради. Памуккалада 20 га яқин иссиқ булоқ мавжуд. Мутахассислар мушак-скелет тизими, юрак-қон томир ва тери касалликларини даволаш учун қайси булоқлардан фойдаланиш кераклигини тавсия қилишади.

Ҳаво шарида саёҳат: Каппадокия

Каппадокияга сайёҳлар оқими камайганда борган маъқул: март—апрель ойларида ҳаво салқин бўлади, сайёҳлар ҳам кўп бўлмагани сабабли манзаралардан тўлиқ завқ оласиз. Бу ерлардаги ғорларда Византиянинг гуллаб-яшнаган давридан қолган тасвирларни учратиш мумкин. Агар кўпроқ экзотикани хоҳласангиз, тик қоя устига қурилган меҳмонхонага ташриф буюринг.

Ҳақиқий Туркия: Истанбул

Фрилансерлар ва масофавий ишлайдиганлар орасида Истанбулга бир-икки ойга бориш сўнгги йилларда ҳақиқий тенденцияга айланди. Бу ерда ижара нархи ўртача, интернет барқарор ва арзон. Истанбул тасаввур қилганингиздан-да катта шаҳар: Беёғли марказида дам олишингиз, Бешиктошда денгиз ва паром манзараларидан баҳраманд бўлишингиз, зерикканингизда эса Шаҳзодалар оролига саёҳат уюштиришингиз мумкин.

Харид қилиш: Бурса

Мамлакатнинг энг йирик шаҳарларидан бири бўлган Бурса турк тўқимачилик пойтахтидир. Бу ердаги ранг-баранг бозор ва дўконлардан матолар, тўқимачилик буюмлари, кийим-кечак ва бошқа нарсаларни улгуржи нархларда топиш мумкин. Туркиянинг энг йирик тўқимачилик ва тикувчилик саноати ушбу ҳудудда жойлашган. Шаҳарнинг марказида машҳур Ипак бозори жойлашган. Бу ердан Бурсанинг афсонавий ипагидан тайёрланган деярли ҳар қандай кийим ёки аксессуарни топиш мумкин.

Туркча шопингда қанча нарса харид қилишингиз эмас, балки у ердаги жараён завқлидир. Бирорта дўконда туркча чойни лукум билан аста-секин ичиш асносида дўкон эгаси сизга бутун маҳсулотини намойиш этади. Таассуротлар эса узоқ вақтгача сизни тарк этмайди.