Turkiyada sayyohlarning kunlik turar joy uchun qancha mablag‘ sarflashi e’lon qilindi

Turkiya 2021-yilning ikkinchi choragida turizm sohasidan 3 milliard 3 million 628 ming dollar daromad olgan. Bu haqda “RusTurkey.com” xabar beradi.

Turkiya statistika instituti (TÜİK)ning ma’lum qilishicha, turizmdan tushgan daromadning (mobil aloqa, transport vositalaridan foydalanish va yaxta xizmatlarini hisobga olmaganda) 73,1 foizi xorijlik sayyohlardan olingan. Xorijda istiqomat qiladigan Turkiya fuqarolarining mamlakatga tashrif buyurishi esa 26,9 foizni ta’minlagan.

Qayd qilinishicha, aprel—iyun oylarida sayohatchilarning shaxsiy xarajatlaridan 2 milliard 436 million 913 ming dollar, turistik to‘plamlardan esa 566 million 716 ming dollar kelib tushgan. Sayyohlar kunlik turar joy uchun o‘rtacha 57 dollar sarflagan. Jumladan, chet ellik sayyohlarning o‘rtacha xarajati 64 dollarni, mamlakatga kelgan xorijda istiqomat qiluvchi turkiyaliklarning o‘rtacha xarajati esa 44 dollarni tashkil qilgan.

2020-yilda Turkiyadan 4 066 210 sayyoh: 77,3 foiz xorijliklar (3 144 815), 22,7 foiz (921 395) diaspora vakillari jo‘nab ketgan.

Hisobotda qayd etilgan davrda 70,3 foiz xorijlik Turkiyaga, asosan, sayohat qilish, sport va madaniy tadbirlarda ishtirok etish hamda ko‘ngil ochish maqsadida tashrif buyurgan. Shuningdek, 14,8 foiz sayyohlar qarindosh va do‘stlarining holidan xabar olish, 6,7 foizi esa kasbi bilan bog‘liq faoliyatni (konferensiya, uchrashuvlarda ishtirok etish) amalga oshirish maqsadida kelgan, deyiladi xabarda.