Qashqadaryo viloyati Qamashi tumanida Nexia avtomobili yo‘ldan o‘tayotgan piyodani urib ketib, voqea joyidan yashiringan. Bu haqda viloyat IIB xabar qildi.
Qayd etilishicha, 2021-yil 25-iyul kuni soat 22:00 larda Qamashi tumani hududidan o‘tuvchi 4R86 Langar–Maydanak avtomobil yo‘lining 9-kilometrida Nexia rusumli avtomashina haydovchisi yo‘lning qatnov qismidan kesib o‘tayotgan piyodani urib yuborib, uning hayotini xavf ostida qoldirib, voqea joyidan yashirinadi.
Oqibatda piyoda olgan tan jarohatlari tufayli voqea joyida vafot etadi.
Aniqlanishicha, haydovchi mast holatda avtomobil boshqargan.
Mazkur holat yuzasidan Qamashi tumani IIBB Tergov bo‘limi tomonidan Jinoyat kodeksining 266-moddasi 2-qismi (odam o‘limiga sabab bo‘lgan transport harakati qoidalarini buzish) va 117-moddasi 2-qismi (xavf ostida qoldirish) bilan jinoiy ish qo‘zg‘atilib hozirda surishtiruv harakatlari olib borilmoqda.
Bundan avval Samarqandda avtobus ag‘darilishi oqibatida 2 yo‘lovchi vafot etdi, 5 nafari shifoxonaga yotqizilgani, Samarqandda Lacetti katta tezlikdan yo‘l yoqasidagi uyga urilishi oqibatida haydovchi va yo‘lovchi vafot etgani hamda Andijonda Damas va ikkita Nexia ishtirokida sodir bo‘lgan YTH oqibatida 26 yoshli yo‘lovchi halok bo‘lgani haqida xabar berilgandi.
Izoh (0)