Samarqand viloyati Kattaqo‘rg‘on tumanida rulni keskin burgan avtobus boshqaruvni yo‘qotib, ag‘darilib ketdi, deya xabar bermoqda YHXBB.
Ma’lum qilinishicha, 2021-yil 31-iyul kuni soat 01:45 larda, Samarqand viloyati, Kattaqo‘rg‘on tumani, “Alijon” MFY hududidan o‘tuvchi M-37 Samarqand–Buxoro–Turkmanboshi avtomobil yo‘lining 71-kilometrida yo‘l ktransport hodisasi yuz bergan. Haydovchi (1983-yilda tug‘ilgan) E.U. Yutong rusumli avtobusda Buxoro–Toshkent yo‘nalishida harakatlanib yo‘lni kesib o‘tayotgan velosipedchini urib yubormaslik uchun rulni o‘ng tomonga burgan va boshqaruvni yo‘qotishi oqibatida avtobus ag‘darilgan.
Oqibatda avtobus salonida bo‘lgan, 24 yoshli J.N. shifoxonada va 40–45 yoshlar atrofida bo‘lgan (shaxsiga aniqlik kiritilmoqda) yo‘lovchi shifoxonaga olib borilayotganda, yo‘lda vafot etgan.
Shuningdek, yo‘lovchilar, 48 yoshli B.S., 29 yoshli A.A., 22 yoshli G.S., 48 yoshli M.B. va 35 yoshli D.A.lar turli tan jarohatlari bilan shifoxonaga yotqizilgan.
Mazkur YTH yuzasidan Kattaqo‘rg‘on tumani IIB huzuridagi Tergov bo‘limi tomonidan Jinoyat kodeksining 266-moddasi 3-qismi “a” bandi (odamlar o‘limiga sabab bo‘lgan transport harakati yoki ulardan foydalanish xavfsizligi qoidalarini buzish) bilan jinoyat ishi qo‘zg‘atilib tergov harakatlari olib borilmoqda.
Bundan avval Qozog‘istonda ichida sakkiz nafar o‘zbekistonlik bo‘lgan Toyota YTHga uchragani, Buxoroda Nexia ag‘darildi, haydovchi va yo‘lovchi mashina tagida qolgani hamda O‘zbekistonda yanvar—iyun oylarida sodir bo‘lgan YTHlar oqibatida 954 kishi halok bo‘lgani haqida xabar berilgandi.
Izoh (0)