Shimoliy Koreya yetakchisi Kim Chen In dushman kuchlarini “tajovuzkorlik maqsadida shiddatli va qat’iy harbiy mashqlar”olib borayotganlikda ayblab, o‘z armiyasini jangovar samaradorlikni oshirish uchun bor imkoniyatlarni ishga solishga chaqirdi. Bu haqda Koreya Markaziy telegraf agentligiga tayanib, “Interfaks” xabar berdi.

Foto: Reuters

“Hozirgi vaqtda dushman kuchlari KXDRga qarshi ogohlantiruvchi zarba berish uchun muntazam ravishda o‘z imkoniyatlarini oshirib bormoqda va qurol-yarog‘ to‘plamoqda, shu bilan birga, tajovuzkorlik yo‘lida har qanday shiddatli va qat’iy harbiy mashqlarni faollashtirmoqda”, — deya Kim Chen Inning so‘zlarini keltirdi agentlik. Shimoliy Koreya rahbari ushbu nutqini Pxenyanda 24—27-iyul kunlari bo‘lib o‘tgan harbiy komandirlar va siyosiy ishchilar seminarida so‘zlagan.

“U barcha harbiy va siyosiy xodimlarni o‘z bo‘linmalarining jangovar samaradorligini oshirish uchun bor kuchini sarflashga chaqirdi”, — deyiladi agentlik xabarida.

Shuningdek, Kim Chen In askarlarni o‘z hayotini Shimoliy Koreya xalqi va mol-mulkining himoyasiga bag‘ishlashga chaqirgan. Uning so‘zlariga ko‘ra, harbiy xizmatchilar “xalq baxtini yaratish uchun, xalqning partiyaga bo‘lgan ishonchini saqlash uchun mas’ul soqchilar” ekani bilan faxrlanishi kerak.

Markaziy telegraf agentligi xabariga ko‘ra, seminarda partiya siyosatini amalga oshirish bo‘yicha harbiy qismlar ishidagi asosiy kamchiliklar batafsil tahlil qilingan. KXDR yetakchisining seminari Janubiy Koreya va AQSh odatda avgust oyining o‘rtalarida bo‘lib o‘tadigan yillik harbiy mashg‘ulotlarni o‘tkazish yoki o‘tkazmaslik masalasini ko‘rib chiqayotgan paytga to‘g‘ri keldi.

Avvalroq Shimoliy Koreya va Janubiy Koreya o‘rtasidagi aloqa liniyalari tiklangan edi. Endi Seul AQSh bilan qo‘shma harbiy mashg‘ulotlar Shimol va Janub o‘rtasidagi kelishuv kayfiyatiga salbiy ta’sir ko‘rsatishi mumkinligidan xavotirda.