Tokio—2020. Taekvondochi Nikita Rafalovich chorak finalga chiqdi, Nigora Tursunqulova esa xitoylik raqibiga yutqazib qo‘ydi

Tokio shahrida o‘tayotgan Olimpiadada 26-iyul kuni bir qator o‘zbekistonlik sportchilar o‘z ishtirokini o‘tkazdi.

Taekvondo bo‘yicha -67 kg vazn toifasida harakat qilayotgan Nigora Tursunqulova 1/8 finalda xitoylik Mengyu Chjanga qarshi jang qildi. Asosiy vaqt 9:9 hisobida yakunlandi. Qo‘shimcha raunda “Oltin zarba”ni ijro etish xitoylik sportchiga nasib etdi. Shu tariqa Rio Olimpiadasida chorak finalga qadar yetib borgan Tursunqulova bu safar ilk bosqichdayoq o‘z yurishini to‘xtatdi.

-80 kg vazn toifasida harakat qilayotgan Nikita Rafalovich eng 1/8 finalda Dominikan vakili Moyzes Ernandesga qarshi jang qildi. Unda o‘zbekistonlik sportchi 17:7 hisobida g‘alaba qozonib, chorak final yo‘llanmasiga ega bo‘ldi.

Rafalovich keyingi bosqichda Ozarbayjon vakili Beygi Harcheganiga qarshi jang qiladi.

25-iyul kuni o‘zbekistonlik taekvondochi Ulug‘bek Rashidov Olimpiya o‘yinlari oltin medaliga sazovor bo‘lgandi.