Dunyoda koronavirusning yanada xavfliroq turi paydo bo‘lishi mumkin. Bu haqda Jahon sog‘liqni saqlash tashkiloti (JSST) rahbari Tedros Adanom Gebreyesus aytib o‘tdi, deb yozmoqda “RBK”.
“Hozirda halokatli oqibatlarga olib kelayotgan delta variantidan ham xavfliroq shtammlar paydo bo‘lmoqda. Shtammlar qanchalik ko‘payaversa, ulardan birortasi vaksinalarni shunchaki chetlab o‘tishi ehtimoli oshadi, natijada hammasini qaytadan boshlashga majbur bo‘lamiz”, — dedi u u Xalqaro olimpiya qo‘mitasining (XOQ) 138-sessiyasida.
JSST rahbarining so‘zlariga ko‘ra, aholining yetarli qismi emlangan taqdirdagina pandemiya to‘xtashi mumkin. Shuning uchun 2021-yil oxiriga qadar har bir mamlakat aholisining 40 foizi, keyingi yil o‘rtalariga kelib esa kamida 70 foizi emlanishi kerak.
“Agar ushbu maqsadlarga erishilsa, biz pandemiyani tugatish va global iqtisodiyotni tiklashga muvaffaq bo‘lamiz”, — dedi JSST rahbari.
Tashkilot rahbarining so‘zlariga ko‘ra, haqiqiy siyosiy majburiyatlarning yo‘qligi pandemiyaning davom etishiga sabab bo‘lmoqda. Uning fikriga ko‘ra, dunyoning yetakchi mamlakatlari koronavirusga qarshi vaksinalarni birgalikda baham ko‘rsa va preparatlarni ishlab chiqarishni kengaytirish uchun imtiyozlar yaratsa, pandemiyani nazoratga olish mumkin bo‘ladi. “Hammaga ma’lumki, koronavirusga kiritilgan sarmoya, odamlarning o‘limiga sabab bo‘luvchi boshqa vositalarga sarflanadigan mablag‘ning juda kichik qismini tashkil qiladi”, — deya qo‘shimcha qildi Gebreyesus.
Avvalroq Gebreyesus dunyoda koronavirus pandemiyasining uchinchi to‘lqini boshlangani haqida ma’lum qilgandi. Shuningdek, u vaksinalarning mamlakatlar bo‘yicha notekis taqsimlanishiga e’tibor qaratdi va buni “hayratda qoldiradigan nomutanosiblik” deb atadi. Uning so‘zlariga ko‘ra, shu sababli dunyoning turli burchaklarida pandemiya ikki xil yo‘l bilan rivojlanmoqda: vaksinalarga ega bo‘lgan mamlakatlar cheklovlarni bekor qilmoqda, ammo emlanmagan guruhlar katta xavf ostida, vaksina olish qiyin bo‘lgan mamlakatlarda aholining aksariyati infeksiyaga qarshi himoyasiz bo‘lib qolmoqda.
Izoh (0)