Nyu-Yorkda iyun oyida “Garri Potter” olamining dunyodagi eng yirik do‘koni (uch qavatli) ochildi. Endilikda u yerda tashrif buyuruvchilar o‘zini xuddi Xogvarts o‘quvchisidek his qilishi uchun virtual reallik attraksioni ish boshladi, deb xabar beradi Esquire.

Foto: Facebook / Harry Potter New York

Birinchi attraksion — “Xogvartsda tartibsizlik” bo‘lib, u o‘yinchini 9 ¾ platformasiga eltadi va u yerda Dobbi bilan tanishtiradi. Elf mehmonni Xogvarts bo‘ylab sayr qildiradi, yo‘lda va sehrli maktabning devorlarida esa ularni qiziqarli sarguzasht hamda jumboqlar kutib turadi. Ularni yechish uchun turli “sehr”lardan foydalanishga to‘g‘ri keladi.

The Hollywood Reporter’ning yozishicha, o‘yinchi oyoqlari ostidagi shovqinni haqiqatda sezadi va hatto erkin qulash holatida bo‘ladi. Attraksion tashrif buyuruvchining harakatlaridan kelib chiqib, bir nechta muqobil finalga ega.

“Uchar sehrgarlar”da mehmonlar og‘ish orqali boshqariladigan qulay supurgilarga ega bo‘ladi. O‘yinchilar Xogvarts uzra parvoz qilishi yoki kviddich maydonini ko‘zdan kechirishi, shuningdek, zaharli tol yonidan uchib o‘tishi mumkin. Shundan so‘ng o‘yinchi Xabrid bilan muhim posilkani Xogvartsga yetkazish maqsadida London uzra parvoz qiladi va “Ajal kushandalari” ta’qibidan qochadi.

Har bir VR-o‘yinning davomiyligi 30 daqiqa bo‘lib, maydonchada bir vaqtning o‘zida olti kishi o‘ynay oladi. Mehmonlar virtual reallikka mo‘ljallangan ko‘zoynakdan tashqari qo‘l va oyoq trekerlari, shuningdek, kichik elektron ryukzak bilan jihozlanadi. Do‘kondagi istalgan o‘yin chiptasi narxi 34 dollarni tashkil etadi.

Avvalroq MyHeritage sayti fotoportretlarni xuddi “Garri Potter”dagi kabi “jonlantirish”ni o‘rganib olgani, HBO Max “Garri Potter” filmlari asosida serial suratga olishi to‘g‘risida xabar berilgandi.