DXX Toshkent, Namangan va Farg‘ona viloyatlarida noqonuniy yer sotish holatlarining oldini oldi. Bu haqda “Daryo”ga DXX matbuot xizmati xabar berdi.
Ma’lum qilinishicha, 2018-yil Toshkent viloyati Bo‘stonliq tumani hokimining qaroriga muvofiq ot sportiga ixtisoslashgan MChJga mehmonxona, kottejlar, otxona, veterinariya bloki, manej, ochiq va yopiq turdagi plats qurish uchun 25,4 gektar yer maydoni ajratilgan. Lekin mazkur jamiyat ta’sischisi amalda hech qanday ish bajarmasdan, o‘zining makler tanishi bilan kelishgan holda ushbu yer maydonini boshqa bir fuqaroga 1,5 million dollarga sotmoqchi bo‘lgan.
DXXning Toshkent viloyati bo‘yicha boshqarmasi, viloyat prokuraturasi va Departament xodimlari tomonidan o‘tkazilgan tezkor tadbirda ular so‘ralgan puldan avans sifatida 700 ming dollar olgan vaqida ushlangan.
Toshkent viloyatining Zangiota va Toshkent tumanlarida istiqomat qiluvchi 3 nafar shaxs o‘zganing nomida bo‘lgan MChJga 2019-yil Zangiota tumani hokimi qarori bilan yuqori texnologik issiqxona qurish uchun ajratilgan 2 gektar yer maydonining 1,5 gektarini boshqa bir fuqaroga rasmiylashtirib, egalik huquqini olib berish evaziga undan 150 ming dollar talab qilgan. Ular oldindan 60 ming dollar olgan vaqtida DXX va Departamentning Toshkent shahar bo‘yicha boshqarmalari xodimlari tomonidan ushlangan.
Toshkent viloyati Zangiota tumanida yashovchi, muqaddam sudlangan shaxs 2018-yil dehqonchilik bilan shug‘ullanmoqchi bo‘lgan fuqaroga mazkur tuman hokimining qarori asosida ajratilgan 35 sotix yer maydonini boshqa bir fuqaroga 80 sotix deya aldab, unga hokimiyat va kadastr idoralarida yuqori lavozimlarda ishlovchi tanishlari orqali egalik huquqini olib berishini va’da qiladi va evaziga 160 ming dollar so‘ragan. U so‘ralgan puldan 30 ming dollarni avans sifatida olgan vaqtida ushlangan.
DXXning Toshkent viloyati bo‘yicha boshqarmasi, viloyat prokuraturasi hamda Departament xodimlari tomonidan o‘tkazilgan tezkor tadbirda maklerlik bilan shug‘ullanuvchi ikki nafar shaxsning noqonuniy harakatlariga ham chek qo‘yilgan.
Xususan, ushbu fuqarolar mahalliy tadbirkorga Bo‘stonliq tumani “G‘azalkent” QFY hududidan o‘tuvchi Chirchiq daryosi bo‘yidan tumandagi MChJlardan biriga qayiqlar to‘xtash joyi va tashrif buyuruvchilarga dam olish joyi yaratish uchun ajratilgan 1 gektar yer sotilayotganini aytib, 260 ming dollar evaziga mansabdor tanishlari orqali ushbu yer maydonini uning nomiga rasmiylashtirib berishini bildirgan. Ular so‘ralgan puldan 20 ming dollarni avans sifatida olgan vaqtlarida ashyoviy dalillar bilan ushlangan.
Bir vaqtning o‘zida Namangan viloyati Kosonsoy tumanidagi paxta va g‘alla yetishtirishga ixtisoslashgan klaster bosh agronomi hamda paxtachilik bilan shug‘ullanuvchi fermer xo‘jaligining ish boshqaruvchisi vazifalarida faoliyat yurituvchi shaxs o‘zganing ishonchiga kirib, unga issiqxona va dala do‘koni qurishi uchun mazkur fermer xo‘jaligi yer maydonidan 2,1 gektarni mansabdor tanishlari orqali uning nomiga rasmiylashtirib berish evaziga 55 ming dollar talab qilgan.
DXXning Namangan viloyati bo‘yicha boshqarmasi xodimlarining viloyat prokuraturasi hamda Departamentning hududiy boshqarmasi vakillari bilan hamkorlikda o‘tkazgan tezkor tadbirida u 45 ming dollar va 106 million so‘m pul mablag‘ini olgan vaqtida ashyoviy dalillar bilan ushlangan.
Farg‘ona viloyati Quva tumani hokimligining ikki nafar sobiq xodimi andijonlik ikki fuqaroga tadbirkorlik bilan shug‘ullanishlari uchun yuqori lavozimda ishlovchi tanishlari orqali tuman hududida joylashgan erkin iqtisodiy zonadan 6 gektar yer ajratib berish evaziga ulardan 28 ming dollar talab qilgan. DXX va Iqtisodiy jinoyatlarga qarshi kurashish departamenti xodimlari tomonidan o‘tkazilgan tezkor tadbirda ushbu fuqarolar 23 ming dollar olgan vaqtlarida ushlangan. Shuningdek, ular so‘ralgan puldan 5 ming dollarini muqaddam olgani ham ma’lum bo‘lgan.
Tergovga qadar tekshiruv harakatlari davomida esa ushbu shaxslar o‘zlarining noqonuniy ishlariga Quva tumani hokimligining investitsiya va tashqi savdo bo‘limi xodimini hamda 1977-yilda tug‘ilgan mahalliy fuqaroni ham jalb etgani aniqlangan.
Qayd etilishicha, hozirda mazkur shaxslarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Bundan avval O‘zbekistonda endi noqonuniy qurilish va yerni o‘zboshimchalik bilan egallash to‘g‘risida Telegram-bot orqali xabar berish mumkinligi, Bo‘stonliqdagi “Bochka” dam olish maskani hududidan fuqaroga 450 ming dollarga yer sotmoqchi bo‘lgan shaxs ushlangani, Jizzax va Buxoroda yerlarni noqonuniy ravishda sotish holatlari aniqlangani haqida xabar berilgandi.
Izoh (0)