Toshkentning Chilonzor tumanida ayol ko‘p qavatli uyning 9-qavatidan tushib ketib voqea joyida halok bo‘lgani haqida xabarlar tarqaldi. Bosh prokuratura matbuot xizmatining “Daryo” so‘roviga asosan ma’lum qilishicha, ayol ehtiyotsizlik oqibatida tushib ketgan.
21-iyun kuni soat 00:20 larda Chilonzor tuman IIO FMB navbatchilik qismiga 102 xizmatidan kelib tushgan xabarga ko‘ra, tumanning “Al-Xorazmiy” mahallasidagi ko‘p qavatli uyning 9-qavatida yashagan 20 yoshli E.O. yotoqxona derazasi ochiq joyidan ehtiyotsizlik oqibatida pastga yiqilib, olgan tan jarohatlari natijasida voqea joyida vafot etgan.
Sudga oid dastlabki tibbiy ekspertizasi xulosasida uning o‘limi bosh miya ochiq jarohati, qo‘l-oyoq va tanasi ko‘plab sohalari sinishi oqibatida kelib chiqqanligi qayd etilgan.
Dastlabki surishtiruvdan ma’lum bo‘lishicha, voqea sodir bo‘lgan vaqtda uyda marhumaning oila-a’zolari, ushbu xonadonda birga istiqomat qiluvchi qaynanasi, ovsini va marhumaning 4 oylik chaqalog‘i bo‘lgan.
Marhuma bola yig‘lagani sababli yotoqxonaga kirib ketgan. Oradan 10-15 daqiqa o‘tib, yotoqxonaga xabar olish uchun kirganlarida bola joyida, lekin kelini marhuma E.O. yo‘qligi, uyni ko‘zdan kechirishganda yotoqxona oynasi ochiqligi, pastga qaragan vaqtda kelini yerda yotganiga guvoh bo‘lishgan. Tez yordam chaqirib, shifoxonaga olib borganlarida u yerda vafot etganligini bilishgan.
Hozirda holat yuzasidan surishtiruv harakatlari olib borilmoqda.
Izoh (0)