Toshkent xalqaro aeroporti 21-iyun kuni Turkiston shahridan Qozog‘istonning FlyArystan loukosteri birinchi reysini qabul qildi, deb xabar bermoqda “Gazeta.uz”. U 180 nafar yo‘lovchini olib kelgan.
Qayd etilishicha, endilikda muntazam reyslar 21-iyundan boshlab haftasiga ikki marta — dushanba va payshanba kunlari Airbus A320 samolyotlarida amalga oshiriladi. Chiptalar narxi bir tomonga 870 ming so‘mdan boshlanadi, parvoz davomiyligi 50 daqiqani tashkil etadi.
Qozog‘iston loukosteri Turkistondan tashqari, Olmaota va Nursultonga ham reyslarni taklif qilmoqda.
FlyArystan — Qozog‘istonning birinchi hamyonbop loukosteri bo‘lib, ilk parvozini 2019-yilning may oyida amalga oshirgan. Bugungi kunda FlyArystan flotida 10 dona Airbus A320 samolyoti mavjud bo‘lib, har kuni Qozog‘iston bo‘ylab va xorijga 70 dan ortiq reyslarni amalga oshirib kelmoqda.
Avvalroq Uzbekistan Airways 15-iyun kuni Domodedovo aeroportiga 2021-yildagi ilk parvozini amalga oshirgani, SkyUp loukosteri O‘zbekistonga muntazam aviaqatnovlarga Ukrainadan ruxsat olgani, O‘zbekiston tomon ruxsat berishi qolgani haqida xabar berilgan edi.
Izoh (0)