Тошкентнинг Чилонзор туманида аёл кўп қаватли уйнинг 9-қаватидан тушиб кетиб воқеа жойида ҳалок бўлгани ҳақида хабарлар тарқалди. Бош прокуратура матбуот хизматининг «Дарё» сўровига асосан маълум қилишича, аёл эҳтиётсизлик оқибатида тушиб кетган.
21 июнь куни соат 00:20 ларда Чилонзор туман ИИО ФМБ навбатчилик қисмига 102 хизматидан келиб тушган хабарга кўра, туманнинг «Ал-Хоразмий» маҳалласидаги кўп қаватли уйнинг 9-қаватида яшаган 20 ёшли Э.О. ётоқхона деразаси очиқ жойидан эҳтиётсизлик оқибатида пастга йиқилиб, олган тан жароҳатлари натижасида воқеа жойида вафот этган.
Судга оид дастлабки тиббий экспертизаси хулосасида унинг ўлими бош мия очиқ жароҳати, қўл-оёқ ва танаси кўплаб соҳалари синиши оқибатида келиб чиққанлиги қайд этилган.
Дастлабки суриштирувдан маълум бўлишича, воқеа содир бўлган вақтда уйда марҳуманинг оила-аъзолари, ушбу хонадонда бирга истиқомат қилувчи қайнанаси, овсини ва марҳуманинг 4 ойлик чақалоғи бўлган.
Марҳума бола йиғлагани сабабли ётоқхонага кириб кетган. Орадан 10-15 дақиқа ўтиб, ётоқхонага хабар олиш учун кирганларида бола жойида, лекин келини марҳума Э.О. йўқлиги, уйни кўздан кечиришганда ётоқхона ойнаси очиқлиги, пастга қараган вақтда келини ерда ётганига гувоҳ бўлишган. Тез ёрдам чақириб, шифохонага олиб борганларида у ерда вафот этганлигини билишган.
Ҳозирда ҳолат юзасидан суриштирув ҳаракатлари олиб борилмоқда.
Изоҳ (0)