“Daryo” internet nashrida qish faslida yog‘gan qalin qor sabab o‘n kunlab tashqi dunyodan uzilib qoladigan Ko‘l qishlog‘i haqida batafsil ma’lumot berilgan edi. Qashqadaryo viloyatining Shahrisabz tumanida joylashgan ushbu hudud mas’ullarning e’tiborsizligi sabab yillar davomida rivojlanishdan ortda qolgani ham bor gap, albatta.
2020-yildagi pandemiya sabab qishloqqa borolmagan “Daryo” muxbiri 2021-yilning 20-iyun kuni yana shu qishloqda bo‘ldi.
Qahraton qishning qorli kunlarida o‘n kunlab tashqi dunyodan uzilib qoladigan qishloq — Shahrisabz tumanining Ko‘l qishlog‘i tuman markazidan 84 kilometr uzoqlikda joylashgan bo‘lsa-da, yo‘lning og‘irligi sabab yo‘lovchilar tuman markazi va qishloq o‘rtasidagi masofani uch soatda bosib o‘tadi.
Ilgari qishloqqa yo‘l olgan kishi Hisorak qishlog‘idan so‘ng “Niva” yoki “UAZ” rusumli avtomobillar xizmatiga ehtiyoj sezardi. Ayni kunda qishloq yo‘li ancha tekislanib, mashinalar qatnovi uchun qulay holatga keltirilgan. Biroq yo‘ldagi jarliklarning qulashi, tosh yumalashi kabi xavf-xatarlar hamon mavjud. Avtomobillar xizmati esa haligacha qimmat narxda.
“Daryo” muxbiri bilan suhbatlashgan “Ko‘l” MFY raisi Ismoil Boboyevning ma’lumot berishicha, qishloq haqida internetda hikoya qilingach, ko‘plab o‘zgarishlar amalga oshirilgan.
“Viloyat hokimi Zoir Mirzayevning shaxsan o‘zi qishlog‘imizda tunab qolib, aholi muammolarini batafsil o‘rgandi. Viloyat rahbari tashrifidan so‘ng, qishloq ahliga yillar davomida xizmat ko‘rsatib kelgan tez tibbiy yordam mashinasi yangilandi. Qishda qishloq yo‘llarini qordan tozalovchi yangi texnika olib berildi. Yangi maktab qurildi. Endi esa 150 o‘rinli davlat bog‘chasi qurilishi rejalashtirilmoqda”, — deydi MFY raisi Ismoil Boboyev.
Ko‘l qishlog‘ida yashovchi fuqarolarning aytishicha, joriy yildagi ob-havo injiqliklari bois qishloqda bahor fasli kutilganidek bo‘lmagan. Ammo shunga qaramasdan, aholi dehqonchilik qilib kartoshka yetishtirishda davom etmoqda.
Eslatib o‘tamiz, mazkur qishloqda ayni kunda 1336 nafar aholi yashaydi.
Mavzuga doir:
- Fotoreportaj: Qishda 10 kunlab dunyodan uzilib qoladigan Shahrisabzdagi Ko‘l qishlog‘ida bir kun
- Qor yog‘sa, tashqi dunyodan uzilib qoladigan Shahrisabzning Ko‘l qishlog‘i uchun qishgacha yo‘ltanlamas tez yordam mashinasi olib kelinadigan bo‘ldi
- Qor yog‘sa, tashqi dunyodan uzilib qoladigan Shahrisabzdagi qishloq aholisiga va’da qilingan yo‘ltanlamas tez yordam mashinasi topshirildi
Izoh (0)