Futbol bo‘yicha Yevro—2020 musobaqasining 1-turi uchrashuvlari yakunlandi. “Daryo” Yevropada to‘rt yillikning eng nufuzli musobaqasi dastlabki tur natijalariga qisqacha to‘xtalib o‘tadi.

A guruhi

Musobaqa Italiya va Turkiya terma jamoalari o‘rtasidagi uchrashuv bilan boshlandi. Ochilish o‘yinida italyanlar Turkiyaga hech qanday imkon qoldirmadi va yirik hisobda taslim etdi. Uels va Shveysariya o‘rtasidagi guruhning ikkinchi o‘yinida esa kutilganidek kuchlar teng keldi. Dastlabki xulosalardan ko‘rinib turibdiki, bu guruhda kurash ikkinchi va eng yaxshi uchinchi o‘rinni olish uchun kechadi. Italiya esa so‘zsiz favorit.

Foto: “Daryo” / Husan Sobitov

1-tur o‘yinlari tugaganidan bir o‘tiboq, ikkinchi turga start beriladi. 16-iyun kuni A guruhning ikki o‘yini ham bo‘lib o‘tadi. Bu tur guruhda ko‘p narsani hal qiladi.

B guruhi

Bu guruhda ham shunga o‘xshash vaziyat. Belgiya dastlabki turda guruhda muammo tug‘dirishi kutilgan Rossiyani tor-mor etdi. Daniya va Finlyandiya o‘rtasidagi bahsda nimalar bo‘lib ketganini aytib o‘tirish shart emas. Kutilmagan vaziyat sabab o‘yin natijasi sensatsion ko‘rinish oldi: musobaqa debyutanti Daniyani mag‘lub etdi. Navbatdagi qo‘lga kiritilgan ochko finlarni keyingi bosqichga olib chiqishi ham mumkin.

Foto: “Daryo” / Husan Sobitov

C guruhi

Niderlandiya 1-turning eng qiziqarli uchrashuvlaridan birida Ukrainani 3:2 hisobida taslim etdi. Guruhning ikkinchi o‘yinida Avstriya kutilganidek Makedoniyaga qarshi o‘yinni muvaffaqiyatli yakunladi. Biroq jamoa Niderlandiya va Ukrainaga qarshi qiyin o‘yinlar kutib turibdi.

Foto: “Daryo” / Husan Sobitov

D guruhi

Guruh favoriti Angliya birinchi turda Xorvatiyaga qarshi o‘ynadi va Rahim Sterlingning yagona goli bilan raqibidan ustun keldi. Keyingi o‘yinda Patrik Shik o‘zining dubli bilan Chexiyaga Shotlandiya ustidan ishonchli g‘alabani olib keldi. Ikkinchi turda Xorvatiya va Chexiya o‘rtasidagi o‘yin ko‘p savollarga oydinlik kiritadi.

Foto: “Daryo” / Husan Sobitov

E guruhi

Bu guruh dastlabki turdanoq qiziqarli natijalar bilan tugadi. Avvaliga Polsha terma jamoasi Slovakiyaga yutqazib qo‘ydi. Keyin esa Ispaniya Shvetsiyani yenga olmadi. Keyingi turda Ispaniya va Polsha o‘zaro to‘qnash keladi. Bu o‘yindagi mag‘lubiyat Levandovski boshliq polshaliklarni tang ahvolga solib qo‘yishi mumkin.

Foto: “Daryo” / Husan Sobitov

F guruhi

Portugaliya bu safar Yevro guruh bosqichida Vengriyaga to‘qnash keldi. Faqat bu safar so‘nggi emas, birinchi turda. Garchi jamoa yirik hisobdagi g‘alabani qo‘lga kiritgan bo‘lsa-da, natija osonlikcha qo‘lga kiritilmadi. Turning markaziy o‘yinida esa Fransiya terma jamoasi Germaniyaga imkon qoldirmadi. Ha, hisob minimal ko‘rinish oldi, biroq fransuzlar ko‘p jabhada nemislarni ortda qoldirdi.

Foto: “Daryo” / Husan Sobitov

Eng yaxshi to‘purarlar va assistentlar

Birinchi turda uch nafar futbolchi dubl qayd etgan holda musobaqa to‘purarlari poygasida yetakchiga aylandi Patrik Shik, Krishtianu Ronaldu va Romelu Lukaku ayni vaqtda qolganlardan ko‘proq gol urgan.

Assistentlar jadvalida esa Rafa Silva yetakchi bo‘lib turibdi. Vengriyaga qarshi o‘yinda zaxiradan maydonga tushib, Portugaliyaning uchala golida ham qatnashgan (ikkita assist va bitta penalti ishlab berdi) futbolchi asosiy tarkibda tushishga loyiq ekanini isbotladi.

Foto: “Daryo” / Husan Sobitov

1-tur statistikasi

  • 1-turda beshta terma jamoasi uchta gol urdi: Italiya, Belgiya, Avstriya, Niderlandiya va Portugaliya;
  • Jami 28 ta gol urildi. Ularning 21 tasi ikkinchi bo‘limda, 7 tasi birinchi bo‘limda;
  • Raqib jarima maydonida to‘pga teginish borasida Daniya yetakchi (39). Italiya va Niderlandiya (34) undan keyin. Daniyani mag‘lub etgan Finlyandiya esa eng oxirgi o‘rinda (2);
  • Angliya, Shotlandiya, Slovakiya, Shvetsiya va Fransiya bir martadan darvoza to‘sin-ustunini nishonga oldi;
  • Dribling borasida Niderlandiya terma jamoasi yetakchi (29). Ikkinchi o‘rinda Belgiya (25), uchinchi pog‘onada esa Vengriya (25). Muvaffaqiyatli dribling borasida esa Shotlandiya (15) oldinda, keyingi o‘rinda esa Vengriya (14);
  • To‘pga egalik qilish borasida Ispaniya 85,1% bilan musobaqa rekordini qayd etdi. Keyingi o‘rinlarda Portugaliya (69,9%) va Daniya (69,5%).

Tur ramziy terma jamoasi (“Daryo” talqiniga ko‘ra)

Darvozabon: Lukash Gradetski (Finlyandiya);

Himoyachilar: Milan Shkrinyar (Xorvatiya), Rafael Varan (Fransiya), Rafael Gerreyru (Portugaliya), Denzel Dumfriz (Niderlandiya);

Yarim himoyachilar: Jorjinyo (Italiya), Pol Pogba (Fransiya), Frenki de Yong (Niderlandiya);

Hujumchilar: Krishtianu Ronaldu, Rafa Silva (ikkisi — Portugaliya), Patrik Shik (Chexiya).

Foto: “Daryo” / Husan Sobitov

Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!