O‘zbekistonda muhofaza etiladigan tabiiy hududlar 12 foizgacha kengaytiriladi

O‘zbekistonda muhofaza etiladigan tabiiy hududlar 12 foizgacha kengaytiriladi. Bu haqda 15-iyun kuni AOKAda o‘tkazilgan matbuot anjumanida Ekologiya va atrof-muhitni muhofaza qilish davlat qo‘mitasi bo‘lim boshlig‘i Farrux Xurramov ma’lum qildi.

Uning so‘zlariga ko‘ra, 2019—2028-yillarda O‘zbekistonda biologik xilma-xillikni saqlash strategiyasining asosiy maqsadi biologik xilma-xillik Konvensiyasi talablarini amalga oshirishdan iborat. Strategiya 9 ta bobdan iborat bo‘lib, 2 ta asosiy bosqichda amalga oshiriladi:

1. 2019—2023-yillarda bioxilma-xillikka oid normativ-huquqiy hujjatlar bazasini shakllantirish.
2. 2024—2028-yillarda atrof-muhit muhofazasi, bioxilma-xillikni saqlash masalalari bo‘yicha ijobiy ko‘rsatkichlarga erishish.

Shuningdek, strategiyada 2028-yilgacha muhofaza etiladigan tabiiy hududlar hajmini 12 foizgacha kengaytirish masalasi ham ko‘zda tutilgan.