O‘zbekistonda koronavirusga qarshi vaksinaning ikkinchi dozasi bilan emlanganlar soni 1 mln kishidan oshdi

O‘zbekistonda 15-iyun kuni jami 41 373 kishi COVID-19’ga qarshi emlandi, deb xabar berdi Sog‘liqni saqlash vazirligi matbuot xizmati. Shulardan 18 137 nafari birinchi bosqichda, 12 890 nafar fuqaro ikkinchi bosqichda hamda 10 346 nafar fuqaro esa uchinchi bosqichda emlangan.

Hozirgi kungacha O‘zbekistonda koronavirusga qarshi 2 695 058 doza vaksinadan foydalanildi, ularning 68 375 dozasi uchinchi va 1 002 919 dozasi ikkinchi bosqichda qo‘llanilgan. Shunga ko‘ra, mamlakatda jami emlanganlar soni 1 623 764 kishini tashkil etmoqda.

15-iyun kunidagi emlash ko‘rsatkichlari bo‘yicha yuqori o‘rinlarni:

• Toshkent viloyati (6104 doza),
• Namangan viloyati (4749 doza),
• Samarqand viloyati (4618 doza) band qildi.

Koronavirusga qarshi emlangan aholi soni

• Farg‘ona viloyatida 321 690 doza,
• Namangan viloyatida 312 573 doza,
• Andijon viloyatida 311 894 dozani tashkil qilmoqda.

Ma’lumot uchun, O‘zbekistonning vaksina zaxirasi 5,4 million dozaga yetdi. 10-iyun kuni ZF-UZ-VAC2001 vaksinasining million dozadan iborat 5-partiyasi, shuningdek, “Sputnik V” vaksinasining 70 ming dozalik 2-komponenti olib kelingandi. Mamlakatda iyun oyi oxirigacha 4 million kishini koronavirusga qarshi emlash rejalashtirilgan.