O‘zbekistonda 1-sinfga onlayn qabul tizimi ishga tushirildi

O‘zbekistonda 2021/2022-o‘quv yili uchun umumta’lim maktablariga 1-sinfga onlayn qabul uchun ro‘yxatdan o‘tish va ariza topshirish jarayoni boshlandi, deb xabar bermoqda Xalq ta’limi vazirligi matbuot xizmati.

Qabul uchun arizalarni my.maktab.uz elektron platformasi orqali topshirish mumkin. Xizmat Toshkent shahri, Qoraqalpog‘iston Respublikasi va viloyatlar markazidagi umumta’lim maktablari uchun mavjud.

Biriktirilgan mikrohududdan tashqari tanlangan ikkinchi va uchinchi maktablarda, maktab sig‘imidan kelib chiqib, bo‘sh o‘rin mavjud bo‘lgan taqdirda, qo‘shimcha o‘quvchilar o‘rni (kvota) ajratiladi.

Eslatib o‘tamiz, Xalq ta’limi vazirligi axborot xizmati rahbari Laylo Rustamova Respublika umumta’lim maktablarida 1-sinfga qabul 15-iyundan boshlanishini ma’lum qilgandi.

Jarayon 2 bosqichda bo‘ladi:

Birinchi bosqichda ota-onalar 2021-yilning 15-iyunidan 5-iyuliga qadar my.maktab.uz elektron platformasi orqali ro‘yxatdan o‘tib, farzandlari 1-sinfga chiqadigan maktablarni tanlaydi.

Bunda ota-onalarga 3 ta maktabni tanlash imkoniyati beriladi. Birinchi maktab — ota-ona doimiy istiqomat qilayotgan hududdagi maktab, ya’ni yashash manzili biriktirilgan mikrohududdagi maktab;

Ikkinchi va uchinchi maktablar — ota-onalarning ixtiyoriy tanlovi asosida farzandlarining qatnashi uchun qulay bo‘lgan maktablar.

Ikkinchi bosqichda 2021-yilning 6-iyulidan 31-iyulga qadar ota-onalar elektron platforma orqali tanlagan birinchi maktabga, ya’ni biriktirilgan mikrohududdagi maktabga hujjatlarini topshiradi, bunda hujjatlarni topshirish to‘liq elektron shaklda amalga oshiriladi. Ota-onalarning doimiy yashash manzili bo‘yicha biriktirilgan mikrohududdagi maktabga joylashishlari kafolatlanadi.

Agar ota-onalar mikrohududdagi maktabni emas, boshqa maktablarni tanlagan bo‘lsa, ya’ni elektron ro‘yxatdan o‘tish vaqtida tanlagan ikkinchi yoki uchinchi maktablarning birida bo‘sh o‘rinlar bo‘lgan taqdirda, 1—15-avgust kunlari hujjatlarini topshirishi mumkin bo‘ladi.

Qolgan hududlar (Qoraqalpog‘iston Respublikasi va viloyatlarning boshqa tuman (shahar)lari) umumta’lim maktablarida 1-sinfga qabul an’anaviy shaklda, ya’ni bevosita maktabda amalga oshiriladi.

Qabul an’anaviy shaklda amalga oshiriladigan hududlarda ota-onalar bevosita 2021-yil 15-iyundan 15-iyulga qadar doimiy yashash manzili bo‘yicha biriktirilgan mikrohududdagi maktabga farzandlarini 1-sinfga joylashtirish uchun hujjatlarini topshirishi mumkin.

Shuningdek, 16-iyuldan 15-avgustga qadar ota-onalarga ixtiyoriy tanlov asosida boshqa maktablarga, ya’ni mikrohududiga kirmasa ham, bo‘sh o‘rinlar bo‘lsa, farzandlarini 1-sinfga qabul qilish uchun boshqa maktabga hujjatlarini topshirish imkoniyati beriladi.

Ma’lumot uchun, “Ta’lim to‘g‘risida”gi yangi tahrirdagi qonunning 9-moddasiga asosan bola yetti yoshga to‘ladigan yilda qabul qilinadi (2014-yil 1-yanvaridan 31-dekabrigacha tug‘ilgan bolalar). Mazkur qonun talablari boshqa vazirlik va idoralar tasarrufidagi, mulkchilik shaklidan qat’i nazar, ya’ni nodavlat xususiy ta’lim muassasalari uchun ham majburiydir.