AQShda koronavirusga chalinishning ilk holatlari 2019-yilning dekabr oyida sodir bo‘lgan, qon namunalarini o‘rganish bo‘yicha o‘tkazilgan tadqiqot natijalari shundan dalolat bermoqda. Bu haqda Milliy sog‘liqni saqlash instituti (NIH) ma’lum qildi.
Foto: Getty Images
“Ushbu tadqiqot natijalari shuni ko‘rsatadiki, SARS-CoV-2 infeksiyasi Qo‘shma Shtatlarda qayd etilganidan oldinroq paydo bo‘lgan bo‘lishi mumkin”, — deyiladi NIH axborotida.
Tadqiqot davomida olimlar 2020-yil 2-yanvardan 18-martgacha 50 ta shtat aholisi tomonidan taqdim etilgan 24 000 dan ortiq qon namunalarini tekshirib chiqdi. Unda 2020-yil yanvar oyining boshlariga kelib ma’lum miqdordagi amerikaliklarda antitanalar paydo bo‘lgani aniqlandi. Shu bilan birga, o‘sha paytda mazkur shtatlarda virus yuqtirish holatlari rasman qayd etilmagan edi.
2020-yil 30-noyabr kuni AQSh Sog‘liqni saqlash vazirligining Kasalliklarni nazorat qilish va oldini olish bo‘yicha boshqarmasi (CDC) olimlari ham o‘z tadqiqotlarini o‘tkazgan edi. Natijada COVID-19 infeksiyasining birinchi holatlari AQShda 2019-yil dekabrida sodir bo‘lgani aniqlangan. Amerika Qizil Xoch tashkiloti to‘qqiz shtat aholisidan 13-dekabrdan 17-yanvargacha qon namunalarini olgan. 7389 ta namunaning 106 tasidan SARS-CoV-2’ga qarshi antitanalar topilgan.
AQShda koronavirusga chalinish bo‘yicha birinchi holat 2020-yil 19-yanvarda rasman tasdiqlangan edi.
