Chilonzor tumaniga yangi hokim tayinlandi

Toshkent shahrining Chilonzor tumaniga yangi hokim tayinlandi. Bu haqda poytaxt hokimligi matbuot xizmati xabar berdi.

Ma’lum qilinishicha 16-iyun kuni Xalq deputatlari Chilonzor tumani kengashining navbatdan tashqari o‘tkazilgan sessiyasida Shavkat Mavlonov Chilonzor tumani hokimi etib tasdiqlangan.

Shavkat Mavlonov 2019-yildan buyon Sirdaryo viloyati Ichki ishlar boshqarmasi boshlig‘i lavozimida ishlab kelgan. Uning o‘rnini Samarqand viloyati IIB boshlig‘ining birinchi o‘rinbosari lavozimida ishlab kelgan Shuhrat Bo‘ronov egalladi.

Shavkat Mavlonov 1978-yilda Toshkent shahrida tug‘ilgan. 1999-yilda Ichki ishlar vazirligi akademiyasi, 2012-yilda Ichki ishlar vazirligi akademiyasi oliy akademik kursini tamomlagan.

Eslatib o‘tamiz, Shavkat Mirziyoyev 2021-yilning yanvarida Chilonzor tumanining avvalgi hokimi Sarvar Mahametovni lavozimidan ozod etmoqchi bo‘lgandi. Prezident “hokim yolvorib vazifalarni bajarishga va’da bergani uchun uni ishdan bo‘shatmaganini” aytgandi. Sarvar Mahametov Prezident tomonidan belgilangan vazifalarni uch oy ichida bajarishga va’da berib, lavozimida qolgandi.