Foto: Velopoygada finish chizig‘ini birinchi bo‘lib kesib o‘tgan Qo‘qon hokimi

Farg‘ona viloyatining Qo‘qon shahrida 2021-yil 7—10-iyun kunlari “TechnoWays” texnologik rivojlanish marafoni o‘tkazildi. Bu haqda marafonda qatnashgan “Daryo” muxbiri Azizjon Ermatov xabar berdi.

Ta’kidlanishicha, marafon yoshlarni qiynayotgan muammolarning yechimini topish, ularning innovatsion, texnologik, ilmiy bilimlarini oshirish va startap loyihalarini izlab topishda amaliy ko‘mak ko‘rsatish maqsadida tashkil etilgan.

Qo‘qon universitetida Innovatsiyalarni joriy qilish va texnologiyalar transferi milliy ofisi bilan hamkorlikda o‘tkazilgan marafonda Andijon, Farg‘ona va Namangan viloyatlaridagi oliy ta’lim muassasalarining professor-o‘qituvchilari, iqtidorli talabalari va ko‘ngilli yoshlar qatnashgan.

Marafon davomida ishtirokchilarning innovatsion, texnologik, ilmiy, startap loyiha va ishlanmalari saralab olingan.

Texnologik rivojlanish marafoni doirasida tajribali spikerlar tomonidan ma’ruzalar, treninglar, ma’naviy-ma’rifiy tadbirlar o‘tkazilgan.

Shuningdek, OTMlarning professor-o‘qituvchilari, talabalar hamda yoshlar ishtirokida hududiy innovatsion g‘oyalar ko‘rgazmasi bo‘lib o‘tgan.

“TechnoWays” texnologik rivojlanish marafoni doirasida o‘tkazilgan velopoygada 200 nafarga yaqin ishtirokchi qatorida Qo‘qon shahar hokimi, universitet rektori va sektor rahbarlari ham 8 ming 500 metrlik masofani bosib o‘tgan.

Qayd etilishicha, velopoygada Qo‘qon shahar hokimi Ma’rufjon Usmonov finish chizig‘ini birinchi bo‘lib kesib o‘tgan.