Toshkent viloyati IIBB Uyushgan jinoyatchilikka qarshi kurashish bo‘limi xodimlari tomonidan Zangiota tumanida joylashgan “Bek-baraka” savdo majmuasida o‘tkazilgan tezkor tadbirda tamagirlik bilan shug‘ullangan 6 kishi qo‘lga olindi.

Foto: Toshkent viloyati IIBB axborot xizmati

Ma’lum qilinishicha, 29-may kuni Toshkent viloyat IIBBga fuqaro ariza bilan murojaat qilib, Zangiota tumani hududida joylashgan “Bek-baraka” savdo majmuasida yoyma kiyim-kechak bozorida savdo qilishini, bozorda Kamronbek va Nigina ismli shaxslar savdo qiluvchilardan noqonuniy ravishda pul talab qilayotganini ma’lum qiladi.

Arizaga asosan o‘tkazilgan tezkor surishtiruv ishlari davomida ular o‘zlarini bozorda ishlovchi mas’ul shaxs sifatida tanishtirib, murojaat egalaridan shu joyda ishlashi uchun har oyda 100 AQSh dollari miqdorida tovon puli talab qilgan. Bu talab bajarilmagan taqdirda, savdo rastasi faoliyatini cheklash bilan tahdid qilib kelgan, shu yo‘l bilan ular savdo qiluvchilardan jami 9 million so‘m miqdorida pul olgani aniqlangan.

Shundan so‘ng IIBB tezkor xodimlari tomonidan maxsus tadbir o‘tkazilib, firibgarlik va tamagirlikda gumonlangan 6 nafar shaxs ushlangan.

Jumladan, Uchtepa tumanida yashovchi 1989-yilda tug‘ilgan Nigina I., Marg‘ilon shahrida yashovchi 1995-yilda tug‘ilgan Kamronbek J. va 1993-yilda tug‘ilgan Firdavs J., Zangiota tumanida yashovchi 1968-yilda tug‘ilgan Nasiba O., 1996-yilda tug‘ilgan Noilaxon A. hamda 1998-yilda tug‘ilgan Naimaxon A. ushbu holatga bevosita aloqadorligi aniqlanib, tegishli tartibda ishga jalb qilingan.

O‘tkazilgan suhbat davomida ular haqiqatan ham arizada ko‘rsatilgan fuqarolardan savdo qilishlari uchun noqonuniy ravishda pul talab qilib kelgani va bugungi kunda jami 9 million so‘m miqdoridagi pullarni olib, o‘z ehtiyojlari uchun ishlatib yuborganini ma’lum qilib, aybiga iqrorliklarini bildirgan.

Hozirda ushbu holat yuzasidan ushlangan shaxslarga nisbatan Toshkent viloyati IIBB huzuridagi Tergov boshqarmasi tomonidan Jinoyat kodeksining 168-moddasi (firibgarlik) 3-qismi, 28, 211-moddasi (jinoyat ishtirokchilarining turlari, pora berish) 2-qismi bilan jinoyat ishi qo‘zg‘atilgan.

Avvalroq Buxoroda tadbirkorga qurol o‘qtalib, undan 70 ming dollar talab qilgan sportchilar qo‘lga olingani, Sirdaryoda onasining ko‘z oldida tadbirkorga pichoq tirab, 45 ming dollar talab qilgan jinoiy to‘da ushlangani to‘g‘risida xabar berilgandi.