Тошкент вилояти ИИББ Уюшган жиноятчиликка қарши курашиш бўлими ходимлари томонидан Зангиота туманида жойлашган «Бек-барака» савдо мажмуасида ўтказилган тезкор тадбирда тамагирлик билан шуғулланган 6 киши қўлга олинди.
Маълум қилинишича, 29 май куни Тошкент вилоят ИИББга фуқаро ариза билан мурожаат қилиб, Зангиота тумани ҳудудида жойлашган «Бек-барака» савдо мажмуасида ёйма кийим-кечак бозорида савдо қилишини, бозорда Камронбек ва Нигина исмли шахслар савдо қилувчилардан ноқонуний равишда пул талаб қилаётганини маълум қилади.
Аризага асосан ўтказилган тезкор суриштирув ишлари давомида улар ўзларини бозорда ишловчи масъул шахс сифатида таништириб, мурожаат эгаларидан шу жойда ишлаши учун ҳар ойда 100 АҚШ доллари миқдорида товон пули талаб қилган. Бу талаб бажарилмаган тақдирда, савдо растаси фаолиятини чеклаш билан таҳдид қилиб келган, шу йўл билан улар савдо қилувчилардан жами 9 миллион сўм миқдорида пул олгани аниқланган.
Шундан сўнг ИИББ тезкор ходимлари томонидан махсус тадбир ўтказилиб, фирибгарлик ва тамагирликда гумонланган 6 нафар шахс ушланган.
Жумладан, Учтепа туманида яшовчи 1989 йилда туғилган Нигина I., Марғилон шаҳрида яшовчи 1995 йилда туғилган Камронбек Ж. ва 1993 йилда туғилган Фирдавс Ж., Зангиота туманида яшовчи 1968 йилда туғилган Насиба О., 1996 йилда туғилган Ноилахон А. ҳамда 1998 йилда туғилган Наимахон А. ушбу ҳолатга бевосита алоқадорлиги аниқланиб, тегишли тартибда ишга жалб қилинган.
Ўтказилган суҳбат давомида улар ҳақиқатан ҳам аризада кўрсатилган фуқаролардан савдо қилишлари учун ноқонуний равишда пул талаб қилиб келгани ва бугунги кунда жами 9 миллион сўм миқдоридаги пулларни олиб, ўз эҳтиёжлари учун ишлатиб юборганини маълум қилиб, айбига иқрорликларини билдирган.
Ҳозирда ушбу ҳолат юзасидан ушланган шахсларга нисбатан Тошкент вилояти ИИББ ҳузуридаги Тергов бошқармаси томонидан Жиноят кодексининг 168-моддаси (фирибгарлик) 3-қисми, 28, 211-моддаси (жиноят иштирокчиларининг турлари, пора бериш) 2-қисми билан жиноят иши қўзғатилган.
Аввалроқ Бухорода тадбиркорга қурол ўқталиб, ундан 70 минг доллар талаб қилган спортчилар қўлга олингани, Сирдарёда онасининг кўз олдида тадбиркорга пичоқ тираб, 45 минг доллар талаб қилган жиноий тўда ушлангани тўғрисида хабар берилганди.
Изоҳ (0)