92 yoshli britaniyalik ayol Sandringem saroyining to‘qilgan nusxasini yaratdi (foto)

Margaretning buning uchun taxminan ikki yil, aniqrog‘i, taxminan 7300 soat vaqti ketdi! Haqiqiy Sandringem saroyi egasi – qirolicha Yelizaveta II uning ijod namunasini yoqtiradimi?

Britaniyaning 92 yoshli fuqarosi Margaret Siman qirol oilasiga tegishli Sandringem saroyining to‘qilgan nusxasini yaratdi.

Sandringem saroyining to‘qilgan nusxasi  – uzunligi 5,5 metr va 1,8 metr kenglikda. Ushbu asar Norfolk hunarmandlari xayriya festivalida namoyish etildi: ko‘rgazmadan tushadigan pul Norfolk okrugidagi uchta kasalxonani qo‘llab-quvvatlashga sarflanadi.

Simanning so‘zlariga ko‘ra, u erining vafotidan keyin to‘qishni boshladi. “Men klubga qo‘shildim va sevimli mashg‘ulotim shu tariqa boshlandi, – deydi Margaret. – Avvaliga bolalar va nabiralar uchun to‘qiganman. Va Norfolk hunarmandlari festivali xayriya uchun pul yig‘ayotganini bilganimda men ham foydali biror ish qilishni xohladim. Hammasi shundan boshlandi”.

Simanning ishi chindan ham mashaqqatli. U saroyni aniq qayta tiklabgina qolmay, balki uning hududida joylashgan cherkov va otxonalarni ham eng kichik detallariga qadar takrorladi. Shuningdek, Margaret saroy xodimlari haqida ham unutmagan — bog‘da maysazor va gullarga g‘amxo‘rlik qilayotgan mayda odamchalarni uchratish mumkin.

Ma’lum bo‘lishicha, Yelizaveta II 1952-yilda Sandringem saroyini otasi Jorj VI dan meros qilib olgan. Bu 8000 gektar ov maydonida joylashgan Vindzor mulki. Qirol oilasi bu yerda an’anaviy ravishda Rojdestvoni nishonlaydi.