Tailandda 11 yoshli qizcha har hafta hayvonot bog‘ida konsert bermoqda. Uning asosiy muxlislari — lemurlar, zebra va begemotlar
Tailandda Seenlada Supat ismli 11 yoshli qizaloq har hafta Bangkok janubi-sharqidagi hayvonot bog‘ida sintezatorda musiqa ijro etmoqda, deb xabar beradi Meduza.
Ta’kidlanishicha, musiqiy klavish ijrosini, asosan, qiziquvchan lemurlar kuzatadi.
Supat o‘z chiqishi orqali zebralar, surikatlar, begemot va hayvonot bog‘idagi boshqa jonzotlarga yolg‘izlikni yengishga yordam bermoqda. Uning fikricha, koronavirus pandemiyasi sabab joriy etilgan cheklovlar oqibatida hayvonlarga insonlar bilan muloqot yetishmayapti. Shu orqali qizcha eski ommaviy chiqishlarni qayta yo‘lga qo‘yishga urinmoqda.
Ba’zida hayvonlar juda yaqin kelib, hatto musiqa ijro etishga xalaqit beradi, biroq bu unga yoqadi — jonivorlar xuddi u bilan birga o‘ynayotgandek. Hayvonot bog‘i ma’muriyatining ta’kidlashicha, musiqa hayvonlarning kayfiyatiga yaxshi ta’sir ko‘rsatadi — ayrimlarga u rostdan ham yoqadi, boshqalar esa kamida bunga qiziqish bildiradi.
Avvalroq Chexiyada ikkita turli hayvonot bog‘idagi shimpanzelar zerikmasligi uchun ularga videoaloqa o‘rnatib berilgani to‘g‘risida xabar berilgandi.
