O‘zbekistonda “fudtrak”lar orqali savdo qilishning yangi tartibi tasdiqlandi. U dekabr oyidan kuchga kiradi

Prezident Shavkat Mirziyoyev “Ko‘chma savdo faoliyatiga axborot texnologiyalarini joriy etish va savdo avtomati orqali chakana savdo faoliyati bilan shug‘ullanuvchi tadbirkorlik subyektlarini qo‘llab-quvvatlash chora-tadbirlari to‘g‘risida”gi qarorni imzoladi, deb xabar beradi O‘zA. Unga ko‘ra, 1-dekabrdan boshlab barcha jarayonlar onlayn, maxsus “K-Savdo” platformasida amalga oshiriladi.

Qarorga muvofiq:

• ko‘chma savdo faoliyati tadbirkorlik subyektlari tomonidan ko‘chma savdo obyektlarini elektron tarzda “K-Savdo” avtomatlashtirilgan axborot tizimida ro‘yxatdan o‘tkazish yo‘li bilan amalga oshiriladi. Bunda tadbirkorlik subyektlaridan ro‘yxatdan o‘tkazish uchun yig‘im undirilmaydi;
• ko‘chma savdo joyi (xususiy mulkdorlarga tegishli joylardan tashqari) ko‘chma savdo obyektlarining joylashish sxemalari bo‘yicha “K-Savdo” orqali elektron auksionda sotiladi.

Auksionning boshlang‘ich narxi tegishli tuman (shahar)dagi yer uchastkasining yer solig‘i miqdorida belgilanadi. Bunda auksion orqali sotishdan kelib tushgan pul mablag‘larining 80 foizi tegishli tuman (shahar) mahalliy budjetlariga, 20 foizi Davlat soliq qo‘mitasining maxsus hisob raqamiga yo‘naltiriladi.

Auksion g‘olibi tomonidan ko‘chma savdo joyining qiymati to‘liq to‘langanidan so‘ng unga “K-Savdo” orqali avtomatik ravishda QR-kod qo‘yilgan guvohnoma beriladi hamda u mazkur joydan 36 oy muddatga foydalanish huquqiga ega bo‘ladi. Bunda ko‘chma savdo joyidan foydalanish bo‘yicha shartnoma tuzish talab etilmaydi.

Shuningdek, tadbirkorlik subyektlari yoki fuqarolarning “K-savdo”da ro‘yxatdan o‘tmasdan ko‘chma savdo faoliyati bilan shug‘ullanayotganligi birinchi marta aniqlangan taqdirda, davlat soliq xizmati organlari xodimlari ularga chakana savdo faoliyatini “K-Savdo” ro‘yxatdan o‘tgan holda amalga oshirish bo‘yicha zarur tushuntirish ishlarini olib borishi hamda ro‘yxatdan o‘tkazish bo‘yicha amaliy yordam ko‘rsatishi lozim.

Savdo avtomatlari orqali tovarlarni sotish va (yoki) xizmatlarni ko‘rsatish faoliyati bilan shug‘ullanuvchi tadbirkorlik subyektlarini yanada qo‘llab-quvvatlash maqsadida:

• savdo avtomatlariga nisbatan nazorat-kassa texnikalaridan majburiy foydalanish talabi tatbiq etilmaydi;
• sotadigan tovarlari va (yoki) ko‘rsatadigan xizmatlari turidan qat’iy nazar bunday faoliyat bilan shug‘ullanuvchi yuridik shaxslar chakana savdo sohasidagi soliq to‘lovchi deb e’tirof etiladi.

Eslatib o‘tamiz, 2020-yilda O‘zbekistonda tadbirkorlarning ruxsat olishda shaffof mexanizmning yo‘qligi sabab yozgi terrasalar noqonuniy deb topilayotgani to‘g‘risida xabar berilgandi. Masalan, “qog‘ozda” munitsipal hududga fudtrak (kafe-furgon) joylashtirish uchun hududga javobgar hokimlik bilan shartnoma imzolash kifoya, biroq reglament yo‘qligi sabab buni amaliyotda qo‘llash imkonsiz edi.