Россияда оғир аҳволда қолган Ўзбекистон фуқаролари ватанга қайтарилади, дея хабар қилмоқда Ташқи меҳнат миграцияси.
Қайд этилишича, самарқандлик А.Н. оилавий шароити оғирлиги сабабли 2007 йилда Россияга ишлагани боради. 2020 йилда А.Н. қурилиш объектида мажбурлаб ишлатилади. Мажбурий меҳнатдан қочиш мақсадида қурилиш объекти атрофидаги ўрмонзорга яширинишга мажбур бўлади. Ўрмонзорда адашиб, бир неча кун совуқда қолиб кетиши оқибатида икки оёғидан ажралади.
Агентликнинг Санкт-Петербург шаҳридаги ваколатхонаси, Ўзбекистоннинг Санкт-Петербург шаҳридаги Бош консулхонаси ҳамкорлигида фуқарога бирламчи тиббий ёрдам олиши учун кўмаклашилди, «Ватанга қайтиш гувоҳномаси» расмийлаштириб берилди. Ҳомийларнинг молиявий кўмаги билан 6 июнь куни Санкт-Петербург—Самарқанд авиарейси орқали Ўзбекистонга қайтарилди.
Шунингдек, Самарқанд вилоятидан Ш.Н. ва М.С. пандемия шароитида иш тополмай, пулсиз қийин аҳволда қолган.
Ушбу фуқаролар Хорижда меҳнат фаолиятини амалга оширувчи фуқароларни қўллаб-қувватлаш ҳамда уларнинг ҳуқуқ ва манфаатларини ҳимоя қилиш жамғармаси маблағлари ҳисобидан Санкт-Петербургдан Самарқандга олиб келинди.
Бундан аввал Россияда мураккаб вазиятда қолган 7 нафар Ўзбекистон фуқаросига ёрдам кўрсатилгани, Россияга кетиб, 18 йил бедарак йўқолган Ўзбекистон фуқароси ватанга қайтарилгани ҳамда Россияда бахтсиз ҳодисага учраган ўзбекистонлик она ва болага ёрдам кўрсатилгани ҳақида хабар берилганди.
Изоҳ (0)